កាលពីព្រឹកថ្ងៃទី ២៤ ខែកក្កដា ឆ្នាំ ២០២៥ កន្លងទៅ មានការផ្ទុះអាវុធវាយប្រហារគ្នារវាងកងទ័ពកម្ពុជា និង កងទ័ពថៃ នៅតាមបណ្តោយព្រំដែនកម្ពុជាថៃក្នុងភូមិសាស្ត្រខេត្តឧត្តរមានជ័យ។ អ្នកនាំពាក្យក្រសួងការពារជាតិបានបញ្ជាក់ឱ្យដឹងច្បាស់ៗថា កងទ័ពថៃបានបើកការបាញ់ប្រហារមកលើកងទ័ពកម្ពុជាមុន ទើបកងទ័ពកម្ពុជាបានប្រើប្រាស់សិទ្ធិការពារខ្លួនក្នុងអធិបតេយ្យ និង បូរណភាពទឹកដីរបស់ខ្លួន ប្រឆាំងនឹងការឈ្លានពានរបស់កងទ័ពថៃ ដែលបានបំពានលើបូរណភាពទឹកដីកម្ពុជា។
ស្របពេលការផ្ទុះអាវុធនៅតាមព្រំដែននៅតែបន្តមិនទាន់ស្ងប់ ពលរដ្ឋស្លូតត្រង់កម្ពុជារាប់ពាន់នាក់រួមមានទាំងមនុស្សចាស់ និងកុមារតូចៗ មានការភ័យខ្លាចរហូតបង្ខំចិត្តធ្វើការជម្លៀសខ្លួនភ្លាមៗចេញពីលំនៅឋានរបស់ពួកគេនៅក្បែរព្រំដែនទៅកាន់ទីតាំងដែលមានសុវត្ថិភាព ដើម្បីគេចពីគ្រាប់ផ្លោងរបស់ចោរឈ្លានពានសៀម។
ទិដ្ឋភាពនៃពលរដ្ឋស្លូតត្រង់កម្ពុជាជាពិសេសមនុស្សចាស់ និង កុមារតូចៗ ដែលរងការប៉ះពាល់ពីសង្គ្រាមឈ្លានពានរបស់កងទ័ពសៀមនៅតាមតំបន់ព្រំដែន គឺពិតជាគួរឱ្យស្រណោះអាណិតអាសូរជាខ្លាំង ដោយមិនគួរណាមកទទួលភាពភ័យខ្លាចដិតដាមក្នុងជីវិតព្រោះតែមហិច្ឆតាចង់បានទឹកដីខ្មែររបស់ចោរសៀមបែបនេះឡើយ៕
ប្រភព៖ Fresh News, BTV Cambodia
