កាលពីថ្ងៃទី ២៧ ខែកុម្ភៈ ឆ្នាំ ២០២៥ កន្លងទៅ ក្រុមហ៊ុនអវកាស Blue Origin របស់មហាសេដ្ឋី Jeff Bezos បានធ្វើការប្រកាសឈ្មោះស្ត្រីចំនួន ៦ នាក់ ដែលនឹងចូលរួមក្នុងបេសកកម្ម NS-31 ដើម្បីហោះទៅកាន់គែមនៃលំហអាកាសដោយជិះលើរ៉ុក្កែត New Shepard។ ចំពោះការហោះហើរនេះដែរនៅមិនទាន់បានកំណត់ពេលវេលាជាក់លាក់នោះឡើយ ដោយគ្រាន់តែរំពឹងថានឹងធ្វើឡើងនៅនិទាឃរដូវនេះ។
ឈ្មោះស្ត្រីទាំង ៦ នាក់ដែលចូលរួមក្នុងបេសកកម្មថ្មីនៃគម្រោងទី ១១ របស់ក្រុមហ៊ុនខាងលើនេះដែររួមមានតារាចម្រៀងស្រី Katy Perry លោកស្រី Lauren Sanchez ដែលជាគូដណ្ដឹងរបស់មហាសេដ្ឋី Jeff Bezos ផ្ទាល់ អ្នកកាសែតដ៏ល្បី Gayle King សកម្មជនសិទ្ធិមនុស្សសញ្ជាតិអាមេរិក-វៀតណាម និង ជាអ្នកស្រាវជ្រាវផ្នែកអវកាសយានិក Amanda Nguyen អតីតអ្នកវិទ្យាសាស្ត្រផ្នែករ៉ុក្កែតរបស់អង្គការ NASA លោកស្រី Aisha Bowe រួមទាំងអ្នកផលិតភាពយន្ត Kerianne Flynn។
តាមសារព័ត៌មាន ABC News បានឱ្យដឹងថា ដំណើរបេសកកម្មមួយនេះមានរយៈពេល ១០ នាទី ដោយយានហោះឡើងដល់កម្ពស់ប្រមាណ ១០៥ គីឡូម៉ែត្រពីផែនដី ដោយរ៉ុក្កែតនោះដែរនឹងធ្វើដំណើរកាត់បន្ទាត់ Karman ដែលជាព្រំដែនរវាងបរិយាកាសផែនដី និង លំហអាកាស ក្នុងកម្ពស់ ១០០ គីឡូម៉ែត្រពីផ្ទៃផែនដី៕
