រូបចម្លាក់តុក្កតា Labubu ជំនាន់ដំបូងដ៏កម្រមួយ ថ្មីៗនេះត្រូវបានគេដេញថ្លៃទិញបានក្នុងតម្លៃជាង ១៥ ម៉ឺនដុល្លាអាមេរិក នៅទីក្រុងប៉េកាំង ក្នុងកម្មវិធីដេញថ្លៃមួយដែលធ្វើឡើងជាពិសេសសម្រាប់ពពួកតុក្កតា Labubu ដែលជាប្រភេទតុក្កតាកំពុងតែផ្ទុះល្បីយ៉ាងក្ដៅគគុកខ្លាំងលើពិភពលោកនាពេលបច្ចុប្បន្ន។
Photo: Reuters
រូបចម្លាក់តុក្កតា Labubu នោះដែរមានប្រវែង ១៣១ សង់ទីម៉ែត្រ ជា Labubu ពណ៌បៃតងមានធ្មេញសស្ញាញស្រួចៗចេញមកក្រៅ ដែលបំបែកកំណត់ត្រាសម្រាប់ពពួកតុក្កតា Labubu នេះ ដេញថ្លៃលក់បានរហូតដល់ ១.០៨ លានយ័ន (១៥០ ៣២៤ ដុល្លារ) នៅទីតាំងដេញថ្លៃ Yongle International Auction ដែលធម្មតាជាទីតាំងផ្ដោតលើការដេញថ្លៃលក់គ្រឿងអលង្ការ និង សិល្បៈសម័យទំនើប។
Photo: Reuters
ជាការពិតណាស់ តុក្កតា Labubu បច្ចុប្បន្នគឺជាប្រភេទតុក្កតា on trend បំផុតមួយលើពិភពលោក ដោយតុក្កតានេះដែរត្រូវបានបង្កើតឡើងដោយលោក Kasing Lung និង ដាក់ចេញលក់លើទីផ្សាតដោយក្រុមហ៊ុនយក្សលក់តុក្កតា Pop Mart។
Photo: Reuters
គួរបញ្ជាក់ថា ក្នុងកម្មវិធីដេញថ្លៃពិសេសខាងលើនេះដែរ មានតុក្កតា Labubu សរុបទាំងអស់ ៤៨ តុក្កតាត្រូវបានគេយកមកដាក់ដេញថ្លៃ។ ក្នុងនោះដែរ តុក្កតា Labubu ពណ៌ត្នោតប្រវែង ១៦០ សង់ទីម៉ែត្រ គឺជាតុក្កតាទី ២ បន្ទាប់ពីតុក្កតាពណ៌បៃតងដែលដេញថ្លៃលក់បានក្នុងតម្លៃថ្លៃជាងគេចំនួន ១១៤ ០៨៦ ដុល្លារ។ តាមការប្រាប់ពីខាងក្រុមហ៊ុន ចម្លាក់តុក្កតា Labubu បែបនេះគឺផលិតឡើងមានតែ ១៥ រូបប៉ុណ្ណោះ។ ដោយឡែកចំពោះតុក្កតា Labubu ផ្សេងទៀតដែលដាក់ដេញថ្លៃគឺមួយរូបៗលក់បានក្នុងតម្លៃជាង ១ ពាន់ដុល្លារ៕
Photo: Reuters
ប្រភព៖ CNN
