អស់ពីមួយចូលមួយ! យន្តហោះធន់តូចដឹកមនុស្ស ២ នាក់នៅប្រេស៊ីល ធ្លាក់ផ្ទុះឆេះកណ្ដាលផ្លូវថ្នល់​ បង្កការភ្ញាក់ផ្អើលខ្លាំង

កាលពីព្រឹកថ្ងៃទី ០៧ ខែកុម្ភៈ ឆ្នាំ ២០២៥ (ពេលវេលាក្នុងតំបន់) មានហេតុការណ៍ដ៏រន្ធត់មួយបានកើតមានឡើងនៅប្រទេសប្រេស៊ីល ដោយយន្តហោះធន់តូចមួយគ្រឿង Beechcraft King Air F90 បានធ្លាក់ផ្ទុះឆេះលើដងវិថី Marques de Sao Vicente ក្រុង Sao Paulo បណ្ដាលឱ្យមនុស្សលើយន្តហោះចំនួន ២ នាក់ត្រូវបាត់បង់ជីវិតទាំងអស់។

តាមការរៀបរាប់ពីសាក្សីនៅកន្លែងកើតហេតុបានឱ្យដឹងថា យន្តហោះមួយគ្រឿងនោះបានធ្លាក់ផ្ទុះឆេះយ៉ាងសន្ធោសន្ធៅ ខណៈតួយន្តហោះបានដាច់ខ្ទាតក្នុងចំណាតមិនឆ្ងាយប៉ុន្មានពីទីតាំងធ្លាក់ឡើយ ហើយបានទៅបុកបន្តនឹងរថយន្តក្រុងនៅក្បែរនោះ។

គួរបញ្ជាក់បន្ថែមដែរថា ហេតុការណ៍ធ្លាក់យន្តហោះនេះបានកើតមានអំឡុងពេលមនុស្សធ្វើដំណើរតាមដងផ្លូវច្រើន និង ក្រៅពីជនរងគ្រោះបាត់បង់ជីវិតលើយន្តហោះហើយនោះ ក៏មានមនុស្ស ៦ នាក់ផ្សេងទៀតលើដងផ្លូវបានរងរបួសក្នុងហេតុការណ៍នេះផងដែរ។

តាមការបញ្ជាក់ពីមន្ត្រីក្នុងតំបន់បានឱ្យដឹងថា យន្តហោះ F90 គឺធ្វើដំណើរហោះចេះពីព្រលាន Campo de Marte ឆ្ពោះទៅកាន់ Porto Alegre នាភាគខាងត្បូងប្រទេសប្រេស៊ីល តែយ៉ាងណាខាងក្រុមការងារគ្រប់គ្រងចរាចរណ៍ផ្លូវអាកាស Sao Paulo បានដាច់ការទាក់ទងជាមួយយន្តហោះនោះក្នុងពេលត្រឹមប៉ុន្មាននាទីក្រោយហោះចេញ។

ខាងក្រុមស៊ើបអង្កេត មិនទាន់ទម្លាយអត្តសញ្ញាណជនរងគ្រោះដែលស្លាប់នោះឡើយ ហើយចំពោះមូលហេតុបណ្ដាលឱ្យយន្តហោះធ្លាក់ក៏នៅមិនទាន់បញ្ចេញដូចគ្នា៕

Photo: AP