អភិជនខ្លាំង! ចិញ្ចៀនពេជ្រ Ronaldo សុំមិត្តស្រីរៀបការ គ្រាន់តែពេជ្រធំមួយគ្រាប់ប៉ុនគ្រាប់ខ្នុរនោះ តម្លៃអាចខ្ទង់លានដុល្លារ

កាលពីថ្ងៃទី ១១ ខែសីហា ឆ្នាំ ២០២៥ កន្លងទៅ Georgina Rodriguez បានប្រកាសដំណឹងដ៏រំភើបមួយលើបណ្ដាញសង្គម Instagram របស់នាង ដោយរូបនាងត្រូវបានមិត្តប្រុស Cristiano Ronaldo លើកចិញ្ចៀនសុំរៀបការហើយ ក្រោយទាក់ទងគ្នារយៈពេល ៨ ឆ្នាំមកនេះ។

យ៉ាងណាមិញ ក្រៅពីចូលរួមអបអរ និង រំភើបជំនួសគូស្នេហ៍ដ៏មានឥទ្ធិពលមួយគូនេះហើយ មហាជនជាច្រើនក៏ចាប់ភ្លឹកខ្លាំងទៅលើចិញ្ចៀនពេជ្រគ្រាប់ដ៏ធំនៅលើម្រាមដៃរបស់ Georgina ផងដែរ រហូតអ្នកជំនាញខាងគ្រឿងអលង្ការជាច្រើនបាននាំគ្នាចេញមកវិភាគ ប៉ាន់ប្រមាណពីចិញ្ចៀនមួយវង់នេះ។

ជាក់ស្ដែង បើតាម designer ម្នាក់ប្រចាំក្រុមហ៊ុនគ្រឿងអលង្ការអាមេរិក Estate Diamond Jewerly ឈ្មោះ Benjamin Khordipour បានប៉ាន់ស្មានថា ត្បូងពេជ្រដ៏ធំនៅកណ្ដាលនោះអាចមានទម្ងន់ ២២ ការ៉ាត់ ជាប្រភេទពណ៌កម្រិត H និង មានកម្រិតថ្លាប្រភេទ VS1។ ត្បូងនេះដែរបំពាក់លើតួចិញ្ចៀនធ្វើពីប្លាទីនជាប់នឹងត្បូង ២ សងខាង ដែលមួយៗមានទម្ងន់ ២ ការ៉ាត់។ ចំពោះតម្លៃចិញ្ចៀននេះវិញអាចខ្ទង់ ១.២ លានដុល្លារ។

ដោយឡែក បើតាម Laura Taylor ដែលជាអ្នកជំនាញផ្នែកចិញ្ចៀនភ្ជាប់ពាក្យនៅ Lorel Diamonds បានថ្លែងប្រាប់សារព័ត៌មាន Pagesix ថា៖ «ត្បូងមួយគ្រាប់ដ៏ធំនៅកណ្ដាលចិញ្ចៀននោះអាចមានទម្ងន់ប្រមាណជា ១៥-២០ ការ៉ាត់ និង តម្លៃអាចជាង ២ លានដុល្លារ។ នេះគឺជាចិញ្ចៀនដ៏ទាក់ទាញបំផុតមួយដែលពួកយើងបានឃើញក្នុងប៉ុន្មានឆ្នាំថ្មីៗនេះ ដែលស័ក្តិសមបំផុតសម្រាប់គូស្នេហ៍ដ៏ល្បីឈ្មោះក្នុងវិស័យកីឡាបាល់ទាត់»។

គួររំឭកថា កំពូលកីឡាករបាល់ទាត់ Cristiano Ronaldo និង Georgina Rodriguez បានប្រកាសទំនាក់ទំនងស្នេហាជាផ្លូវការកាលពីដើមឆ្នាំ ២០១៧ កន្លងទៅ។ ក្នុងទំនាក់ទំនងស្នេហាដ៏ស្អិតល្មួតរយៈពេល ៨ ឆ្នាំមកនេះដែរ ពួកគេទទួលបានចំណងដៃកូនៗចំនួន ៥ នាក់ជាមួយគ្នា៕