លោក Lee Jae-myung បេក្ខភាពប្រធានាធិបតីប្រទេសកូរ៉េខាងត្បូងដែលមកពីគណបក្សប្រជាធិបតេយ្យ ត្រូវបានជាប់ឆ្នោតជាប្រធានាធិបតីជាផ្លូវការកាលពីថ្ងៃទី ០៤ ខែមិថុនា ឆ្នាំ ២០២៥ និង បានចូលកាន់តំណែងភ្លាមៗដោយមិនចាំបាច់ដល់ថ្ងៃផ្លាស់ប្ដូរអាណត្តិ។
តាមការប្រកាសដោយគណៈកម្មាធិការជាតិរៀបចំការបោះឆ្នោត (NEC) ថ្មីៗកន្លងទៅ បានបង្ហាញថា លោក Lee Jae-myung ទទួលបានសំឡេងគាំទ្រចំនួន ៤៩.៤២% ខណៈគូប្រជែងមកពីគណបក្សអំណាចប្រជាជន លោក Kim Moon-soo ទទួលបានសំឡេងគាំទ្រចំនួន ៤១.១៥%។ ការកាន់តំណែងជាប្រធានាធិបតីក្នុងអាណត្តិ ៥ ឆ្នាំរបស់លោក Lee Jae-myung គឺត្រូវចាប់ផ្ដើមឡើងភ្លាមៗក្រោយឈ្នះឆ្នោត នៅវេលាម៉ោង ៦ និង ២១ នាទីព្រឹកថ្ងៃទី ០៤ ខែមិថុនា ឆ្នាំ ២០២៥ (ពេលវេលាក្នុងតំបន់) ហើយការស្បថចូលកាន់តំណែងក៏ធ្វើឡើងនៅរសៀលថ្ងៃដដែលនោះផងដែរនៅរដ្ឋសភាប្រទេសកូរ៉េខាងត្បូង។
គួរឱ្យដឹងផងដែរថា ក្នុងសេចក្ដីថ្លែងការណ៍ក្រោយទទួលជ័យជម្នះ លោក Lee Jae-myung សន្យានឹងស្ដារសេដ្ឋកិច្ចឡើងវិញ និង ជួយដល់ការរស់នៅរបស់ប្រជាជន ជាការស្ដារទំនុកចិត្តរបស់សាធារណជនក្រោយការបះបោររបស់អ្នកកាន់អំណាចមុន៕
