កាលពីរសៀលថ្ងៃទី ២០ ខែវិច្ឆិកា ឆ្នាំ ២០២៤ (ពេលវេលាក្នុងតំបន់) តារាសម្ដែងប្រុសកូរ៉េ Song Joong Ki បានធ្វើការប្រកាសដំណឹងដ៏រំភើបថា កូនទី ២ របស់លោកជាមួយនឹងភរិយាជាតារាសម្ដែងជនជាតិអង់គ្លេស Katy Louise Saunders បានកើតឃើញពន្លឺថ្ងៃហើយ ដោយកូនទី ២ របស់តារាមួយគូនេះគឺជាកូនស្រី។
Song Joong Ki បានធ្វើការបង្ហោះលើ Fancafe របស់លោកជារូបកាន់ដៃកូនស្រីដែលទើបនឹងកើតអមដោយសារយ៉ាងរំភើបថា៖ «បច្ចុប្បន្នខ្ញុំកំពុងនៅក្នុងទីក្រុងរ៉ូម ហើយគិតមកទល់ពេលនេះវាជាង ១ ឆ្នាំមកហើយតាំងពីខ្ញុំស្វាគមន៍កំណើតកូនដំបូងរបស់ខ្ញុំនៅទីនេះ។ ខ្ញុំពិតជាមានក្ដីរំភើបខ្លាំងមែនទែនក្នុងការប្រកាសប្រាប់អ្នកទាំងអស់គ្នាថា ខ្ញុំទទួលបានចំណងដៃកូនដ៏ស្រស់សោភាម្នាក់ទៀតហើយ។ ព្រះនាងតូចរបស់យើងបានកើតមកជាមួយសុខភាពយ៉ាងល្អ។ ទាំងប្រពន្ធ និង កូនខ្ញុំ គឺមានសុខភាពល្អធម្មតា និង កំពុងតែសម្រាក»។
គួររំឭកថា កាលពីដើមឆ្នាំ ២០២៣ កន្លងទៅ តារាសម្ដែង Song Joong Ki បានប្រកាសដំណឹងដ៏ភ្ញាក់ផ្អើលដល់អ្នកគាំទ្ររបស់លោកថា លោកបានរៀបការជាមួយនឹងតារាសម្ដែងស្រីអង់គ្លេស Katy Louise Saunders ក្រោយពួកគេទាំងពីរទាក់ទងស្នេហាគ្នាបាន ៣ ឆ្នាំ។ មកដល់ខែមិថុនា ឆ្នាំ ២០២៣ ប្ដីប្រពន្ធតារាមួយគូនេះក៏បានស្វាគមន៍កំណើតតំណក់ឈាមដំបូងរបស់ពួកគេនៅទីក្រុងរ៉ូម ប្រទេសអ៊ីតាលី៕
