អតីតតារា TVB ល្បីមួយរូបទៀតហើយ បរាជ័យនឹងមុខជំនួញ ក៏ងាកមកបើកតូបលក់ជើងមាន់អាំងតាមចិញ្ចើមផ្លូវជាមួយប្រពន្ធ

Vin Choi Kay-Chun ដែលជាអតីតតារាសម្ដែងរបស់ទូរទស្សន៍ TVB មួយរូប ធ្លាប់បង្ហាញខ្លួនក្នុងខ្សែភាពយន្តល្បីៗជាច្រើន ថ្មីៗនេះបានធ្វើឱ្យមហាជនក៏ដូចជាអ្នកគាំទ្ររបស់លោកចាប់អារម្មណ៍ក្រោយឃើញលោកបើកតូបដាក់លក់ជើងមាន់អាំងនៅតាមផ្លូវជាមួយប្រពន្ធ។

កាលពីថ្ងៃទី ០៥ ខែមីនា ឆ្នាំ ២០២៥ កន្លងទៅ អតីតតារាសម្ដែង Vin Choi Kay-Chun អាយុ ៤១ ឆ្នាំ បានធ្វើឱ្យមហជនផ្ទុះការចាប់អារម្មណ៍ខ្លាំងនៅពេលដែលលោកបានបង្ហោះវីដេអូមួយដែលជាវីដេអូលោក និង ប្រពន្ធរៀបចំកន្លែងដាក់អាំងជើងមាន់លក់។ តាមការទម្លាយរបស់លោកបានរៀបរាប់ថា មុខរបររបស់លោកគឺដំណើរការល្អណាស់ពីមួយថ្ងៃទៅមួយថ្ងៃ ហើយសេដ្ឋកិច្ចគ្រួសាររបស់លោកក៏នឹងនផងដែរ។ ជាងនេះទៅទៀត លោកក៏បានបង្កើតជាប្រេនមួយដើម្បីពង្រីកមុខរបររបស់លោកផងដែរ។

ក្នុងមុខរបររបស់លោកនេះផងដែរ ដោយសារតែលោក Vin Choi មិនចូលចិត្ត និង មិនពូកែខាងទំនាក់ទំនង ដូចនេះការងារនេះជាតួនាទីរបស់ប្រពន្ធលោក ខណៈលោកខ្លួនឯងទទួលខុសត្រូវលើការចម្អិត និង លក់ដោយផ្ទាល់។ គួរឱ្យដឹងផងដែរថា មុនងាកមកចាប់មុខរបរលក់ជើងមាន់អាំងនៅតាមផ្លូវ Vin Choi បានវិនិយោគបើកហាង hot pot និង ហាងកាហ្វេ ប៉ុន្តែជំនួញនេះគឺមិនទទួលបានជោគជ័យនោះឡើយរហូតធ្វើឱ្យលោកធ្លាក់ខ្លួនក្រគ្មានសល់សូម្បីប្រាក់សន្សំក្នុងខ្លួន។

ពេលដែលលោកមិនដឹងថាគិតដើរទៅផ្លូវណាទៀត ប្រពន្ធលោកក៏បានណែនាំឱ្យលោកបើកតូបមួយនៅតាមផ្លូវដោយដំបូងលោកបដិសេធមិនធ្វើឡើយព្រោះខ្លាចបាក់មុខ ប៉ុន្តែក្រោយមក ដោយសារតែប្រពន្ធលោកមិនបោះបង់នៅលើកទឹកចិត្ត នៅចាំជួយ ទើបធ្វើឱ្យលោកក្លាហានហ៊ានសាកល្បងនៅមុខរបរនេះរហូតមានភាពរីកចម្រើនបែបនេះ៕

ប្រភព៖ VN Express