តារាសម្ដែងស្រី Yu Miao ដែលធ្លាប់ជាតារាល្បីមួយរូបក្រោមទូរទស្សន៍ TVB រយៈពេល ១១ ឆ្នាំ បច្ចុប្បន្នកំពុងតែធ្វើការស៊ីឈ្នួលឱ្យគេនៅចិនដីគោក ក្រោយចាកចេញពី TVB កាលពីឆ្នាំ ២០២៣ កន្លងទៅ។ ល្បីឈ្មោះជាតួស្រីកំណាន់ប្រចាំរឿង «Wonder Women» តារាស្រីវ័យ ៣៧ ឆ្នាំរូបនេះ កំពុងតែមមាញឹកធ្វើការងារក្រៅម៉ោងនៅតាមភោជនីយដ្ឋាន និង ប៊ូទិច នាក្រុង Dongguan ប្រទេសចិន ដោយរូបនាងជាញឹកញាប់តែងចែករំលែកពីជីវិតការងារប្រចាំថ្ងៃរបស់ខ្លួនលើបណ្ដាញសង្គមចិន Xiaohongshu។
ជាក់ស្ដែង កាលពីសប្ដាហ៍កន្លងទៅ តារាស្រី Yu Miao បានបង្ហោះឃ្លីបវីដេអូមួយបង្ហាញពីជីវិតការងារពេញមួយថ្ងៃរបស់នៅហាងប៊ូហ្វេ BBQ មួយកន្លែងជាមួយនឹង caption ថា៖ «អតីតតារាសម្ដែងស្រី TVB បន្តធ្វើការនៅក្រុង Dongguan។ បើគ្មាននរណាធ្វើការនៅ Dongguan ទេ ទុកឱ្យខ្ញុំជាអ្នកធ្វើ»។
នៅទីនោះ ក្រៅពីការងារទទួលការកុម្មង់ពីភ្ញៀវ និង រៀបចំតុអាហារប៊ូហ្វេឱ្យភ្ញៀវ Yu Miao ក៏មានតួនាទីចិតសំបកឪឡឹកចំនួន ៣០ ផ្លែ និង កាត់វាសម្រាប់ឱ្យភ្ញៀវផងដែរ។ ក្រោយបំពេញការងារចប់រួចរាល់ នាងក៏មានពេលសម្រាកហើយយកសំបកឪឡឹកដែលនាងកាត់សល់សាច់ជាប់នោះបន្តិចបន្តួចយកមកញ៉ាំព្រោះតែស្ដាយ។ ខណៈកំពុងញ៉ាំឪឡឹកនោះ Yu Miao ក៏ទទួលបានការស្នើឱ្យទៅសម្ដែងនៅហុងកុងដោយក្នុងមួយថ្ងៃនាងទទួលបានថ្លៃខ្លួន ៥០០ យ័ន (ប្រមាណ ៦៨ ដុល្លារ) ក្នុងមួយថ្ងៃ តែយ៉ាងណារូបនាងនៅស្ទាក់ស្ទើរពិចារណាសិន។ Yu Miao បាននិយាយថា៖ «ឥលូវនេះ ខ្ញុំនៅ Dongguan ហើយក៏ទទួលបានប្រជាប្រិយភាពខ្លះដែរនៅទីនេះ។ ៥០០ យ័ន….ខ្ញុំសុំគិតមើលសិន»។
បើទោះជាថ្លៃខ្លួនថតទទួលបានលើសចំណូលដែលនាងស៊ីឈ្នួលគេរាល់ថ្ងៃដល់ទៅ ៣ ដងក៏ពិតមែន ប៉ុន្តែ Yu Miao មិនសូវចាប់អារម្មណ៍ព្រោះតែហេតុផលថា ការងារជាតារាសម្ដែងគឺមិនជាប់លាប់នោះឡើយ ដោយអ្នកខ្លះអាចនឹងគ្មានការងារគ្មានចំណូលរាប់ខែក៏មាន។ នាងបានរៀបរាប់ថា៖ «ជីវិតនៅ Dongguan គឺគ្រប់គ្រាន់ហើយ។ ថ្ងៃនេះធ្វើការនៅទីនេះ ថ្ងៃស្អែកអាចទៅធ្វើការកន្លែងផ្សេង ចំណូលតែងរកបានជានិច្ច។ ការសម្ដែងវិញ គឺមិនជាប់លាប់ឡើយ ដោយពេលខ្លះយើងត្រូវចាំដល់ ៦ ខែទៅ ១ ឆ្នាំទម្រាំបានមានឈ្មោះសម្ដែង។ នៅ Dongguan ខ្ញុំមានអារម្មណ៍ថាការប្រឹងធ្វើការគឺបានផលហុចឱ្យ ដូច្នេះហើយទើបខ្ញុំនៅតែបន្តធ្វើវា»។
គួរឱ្យដឹងថា ក្នុងវីដេអូចាស់មួយ Yu Miao ធ្លាប់បានទម្លាយដែរថាវាមិនមែនជារឿងប្លែកភ្ញាក់ផ្អើលអ្វីនោះទេដែលឃើញតារាសម្ដែងជាច្រើននៅហុងកុងនាំគ្នាទៅធ្វើការក្រៅម៉ោងនោះ ព្រោះតែចំណូលទទួលបានពី TVB គឺមិនគ្រប់គ្រាន់ក្នុងការចិញ្ចឹមជីវិតនោះឡើយ។ នាងបាននិយាយទៀតថា នាងគិតថាខ្លួនឯងសំណាងហើយដែលអាចរកចំណូលបានជាងមួយពាន់ដុល្លារកាលនៅជាតារាក្រោម TVB ប៉ុន្តែដូចដឹងស្រាប់ហើយនៅហុងកុងថ្លៃឈ្នួលគឺខ្ពស់ខ្លាំង ដូច្នេះហើយវាពិតជាពិបាកក្នុងការមានប្រាក់គ្រប់គ្រាន់ចិញ្ចឹមជីវិតប្រសិនបើមិនឆ្លៀតរកការងារក្រៅបន្ថែមនោះ៕
ប្រភព៖ 8days
