តាមការសិក្សារបស់អ្នកវិទ្យាសាស្ត្រនាពេលថ្មីៗនេះ ដោយប្រើប្រាស់កុំព្យូទ័រដ៏អស្ចារ្យ (supercomputers) បានព្យាករណ៍ថា ភពផែនដីនឹងត្រូវបញ្ចប់ក្នុងពេលវេលាដ៏ជាក់លាក់មួយ ពោលបើតាមលទ្ធផលបង្ហាញថា ភពផែនដីរបស់យើងនឹងលែងមានជីវិតរស់រានទៀតបានក្នុងពេលប្រមាណ ១ ពាន់លានឆ្នាំទៀត ដោយសារតែការកើនឡើងនៃធាតុអាកាសដ៏អាក្រក់មិនអំណោយផល។
កុំព្យូទ័រដ៏អស្ចារ្យរបស់អង្គការ NASA និង មហាវិទ្យាល័យ Toho នៅប្រទេសជប៉ុន បានបង្ហាញលទ្ធផលថា ព្រះអាទិត្យគឺជាមូលហេតុចម្បងគេនៃការវិនាសពិភពលោក ដោយពេលវេលាជាក់លាក់នៃការរលាយភពផែនដីនោះត្រូវបានកំណត់ថានឹងនៅក្នុងឆ្នាំ ១ ០០០ ០០២ ០២១។ ព្រះអាទិត្យនឹងកាន់តែក្ដៅ ហើយវិទ្យុសកម្មនឹងកើនឡើងដូចគ្នា រុញច្រានភពផែនដីឱ្យឡើងកម្ដៅលើសពីអ្វីដែលភាវៈមានជីវិតទ្រាំទ្ររស់រានបាន។
ក្រៅពីការគំរាមកំហែងពីព្រះអាទិត្យ តាមការសិក្សាមួយផ្សេងទៀតដែលចេញផ្សាយលើទិនានុប្បវត្តិ (Journal) «Nature Geoscience» ក្នុងឆ្នាំ ២០២១ ដោយអ្នកវិទ្យាសាស្ត្រ ២ រូប Kazumi Ozaki និង Christopher T. Reinhard បានលើកឡើងថា ភពផែនដីក៏នឹងលែងមានអុកស៊ីហ្សែនគ្រប់គ្រាន់ក្នុងបរិយាកាសដើម្បីផ្គត់ផ្គង់ដល់ជីវិតក្នុងលោក។
អ្នកវិទ្យាសាស្ត្រទាំងពីររូបបានប្រើប្រាស់ការបញ្ចូលគ្នារវាងជីវគីមីវិទ្យា និង គំរូអាកាសធាតុ ដើម្បីសិក្សាពីអាយុកាលបរិយាកាសអុកស៊ីហ្សែនដែលមានលើផែនដី។ ពួកគេពន្យល់ថា ខណៈបរិយាកាសភពផែនដីសម័យបច្ចុប្បន្នមានអុកស៊ីហ្សែនខ្ពស់ និង ពោរពេញដោយភាវៈមានជីវិត តែស្ថានភាពបែបនេះគឺមិនមានជានិរន្តរ៍នោះទេ។ នេះគ្រាន់តែជាសមិទ្ធផលមួយសម្រាប់រុករកជីវិតលើភពដែលដូចភពផែនដីនៅក្រៅប្រព័ន្ធព្រះអាទិត្យរបស់យើងប៉ុណ្ណោះ ដោយវាជួយឱ្យយើងយល់ដឹងថា វត្តមានរបស់អុកស៊ីហ្សែនគឺត្រឹមជាដំណាក់កាលមួយក្នុងប្រវត្តិសាស្ត្រភពផែនដីប៉ុណ្ណោះ។
សរុបមក តាមការសិក្សាបានបង្ហាញថា ភពផែនដីគឺប្រឈមនឹងអនាគតដែលជៀសមិនរួចដែលរាល់ជីវិតទាំងអស់នឹងត្រូវបញ្ចប់ អាចមកពីព្រះអាទិត្យកាន់តែក្ដៅ ឬក៏ដោយសារការថយចុះអុកស៊ីហ្សែនលើបរិយាកាស។ ការព្យាករណ៍ទាំងនេះគឺមិនត្រឹមជាការព្រមានសម្រាប់ភពផែនដីនោះទេ តែក៏ជាមូលដ្ឋានសំខាន់មួយសម្រាប់ការរុករកជីវិតដែលអាចរស់នៅលើភពដទៃនៃចក្រវាលនេះផងដែរ៕
ប្រភព៖ Kenh14
