ក្មេងប្រុសអាយុ ១៨ ឆ្នាំម្នាក់នៅប្រទេសចិនសឹងនឹងត្រូវអស់ជីវិតក្រោយដើរឡើងភ្នំក្នុងអាកាសធាតុត្រជាក់វង្វេងរយៈពេល ១០ ថ្ងៃ តែចេះឆ្លាតនឹកឃើញយកថ្នាំដុះធ្មេញមកញ៉ាំបំពេញក្រពះ ទម្រាំខាងក្រុមសង្គ្រោះរកឃើញជួយសង្គ្រោះបានដោយជោគជ័យ។
ក្មេងប្រុសខាងលើនេះដែរមានឈ្មោះថា Sun Liang ដោយកាលពីថ្ងៃទី ០៨ ខែកុម្ភៈ ឆ្នាំ ២០២៥ កន្លងទៅ រូបគេបានទៅដើរឡើងភ្នំ Qinling ដែលជាភ្នំមានកម្ពស់ជាមធ្យមប្រមាណ ២៥០០ ម៉ែត្រ ហើយក៏ជាដែនជម្រកនៃប្រភេទរុក្ខជាតិ និង សត្វព្រៃចម្រុះជាច្រើនផងដែរ។ រយៈពេល ២ ថ្ងៃក្រោយមក Sun Liang ក៏បាត់ការទាក់ទងជាមួយក្រុមគ្រួសារដោយសារតែឧបករណ៍អេឡិចត្រូនិចរបស់គេអស់ថ្ម។
តាមសារព័ត៌មាន Jimu News បានឱ្យដឹងថា ក្រោយពេល ១០ ថ្ងៃវង្វេងក្នុងព្រៃភ្នំ ហើយអាហារក៏អស់ទៀតនោះ Sun Liang កើតមានគំនិតរិះរកវិធីដើម្បីបន្តជីវិតដោយការពឹងផ្អែកលើទឹកទន្លេ ព្រិលរលាយៗ និង ជាពិសេសនោះគឺញ៉ាំថ្នាំដុះធ្មេញ។ តាមការរៀបរាប់របស់ Sun Liang បានឱ្យដឹងដែរថា រូបគេបានដើរតាមអូរហើយក៏ដួលជាច្រើនលើករហូតធ្វើឱ្យរបួសបាក់ដៃខាងស្ដាំ ពេលនោះក៏មានខ្យល់ខ្លាំងដែរហើយដើម្បីគេចខ្យល់រកកន្លែងជ្រក Liang ក៏បានទៅពួនក្រោមផ្ទាំងថ្មធំៗ យកចំបើង និង ស្លឹកឈើងាប់ៗយកមករៀបធ្វើកន្លែងដេករហូតទាល់តែគេត្រូវក្រុមសង្គ្រោះរកឃើញនៅថ្ងៃទី ១៧ ខែកុម្ភៈ។ ខាងក្រុមភ្នាក់ងារសង្គ្រោះបានចុះប្រតិបត្តិការរុករកក្នុងព្រៃភ្នំនោះ ក្រោយទទួលបានការរាយការណ៍ពីគ្រួសារជនរងគ្រោះ ហើយពួកគេរកឃើញ Sun Liang នៅពេលដែលគេដុតភ្លើងបង្កើតជាផ្សែងរួចស្រែកឱ្យគេជួយ។
គួរឱ្យដឹងថា ទីតាំងឡើងភ្នំក្នុងចម្ងាយ ១៧០ គីឡូរបស់ក្មេងប្រុសខាងលើគឺចាត់ទុកជាទីតាំងដ៏គ្រោះថ្នាក់ខ្លាំងមួយក្នុងចំណោមទីតាំងឡើងភ្នំទាំង ៥ នៅក្នុងប្រទេសចិន។ ក្នុងរយៈពេល ២ ទសវត្សរ៍មកនេះ អ្នកឡើងភ្នំជាង ៥០ នាក់ហើយត្រូវបានរាយការណ៍ថាបាត់ខ្លួន ឬក៏ស្លាប់ក្នុងទីតាំងដ៏គ្រោះថ្នាក់នេះ។ ក្នុងឆ្នាំ ២០១៨ ខាងអាជ្ញាធរក្នុងតំបន់បានហាមប្រាមអ្នកទេសចរមិនឱ្យចូលតំបន់នោះដាច់ខាត និង ថែមទាំងប្រកាសដាក់ពិន័យទៀតលើអ្នកដែលបំពាន។ យ៉ាងណាមិញ ក៏នៅតែមានមនុស្សមួយចំនួនមិនស្ដាប់ ហើយបង្ហាញក្ដីក្លាហានឡើងទៅទីនោះដដែល ហើយបើនិយាយឱ្យជាក់ទៅ Sun Liang គឺជាមនុស្សដំបូងហើយដែលត្រូវបានសង្គ្រោះចេញពីតំបន់នោះ៕
