គូស្នេហ៍ជនជាតិចិនមួយគូកំពុងតែផ្ទុះការចាប់អារម្មណ៍ខ្លាំងលើបណ្ដាញសង្គមក្នុងប្រទេសចិន ក្រោយនារីជាប្រពន្ធបានធ្វើការបង្ហោះរូបថតរៀបការដែលត្រូវបានស្វាមីបញ្ចេញថ្វីដៃគូរវាសលើរូបនាងក្រោយលោកឈ្លោះគ្នាមិនឈ្នះនាង។
រូបភាពដែលបានបង្ហោះនោះមានចំនួន ២ សន្លឹក ដោយមួយប្ដីរបស់នាងបានយកហ្វឺតខ្មៅគូរលើភ្នែក ចិញ្ចើម និង មាត់របស់នាង ហើយថែមទាំងឆ្លៀតគូររូបពស់លើដៃរបស់នាងទៀត។ ដោយឡែកមួយសន្លឹកទៀត ប្ដីរបស់នាងបានគូរវាសលើមុខនាងឱ្យទៅជាជ្រូកប៉ាជេ ដែលឃើញហើយហួសចិត្តផងអស់សំណើចបន្តិចផង។
ការសម្រេចចិត្តទៅបញ្ចេញកំហឹងលើរូបថតរៀបការនេះដែរ បើតាមស្ត្រីជាប្រពន្ធបានឱ្យដឹងថា កើតមានឡើងនៅពេលរសៀលមុនប្ដីរបស់នាងចូលមកសុំទោសនាងវិញ។ យ៉ាងណាមិញ ក្រោយរឿងរ៉ាវមួយនេះត្រូវបានចែកចាយលើបណ្ដាញសង្គមឃើញថាមានមហាជនជាច្រើននាំគ្នាចូលមកបញ្ចេញមតិដោយខ្លះថាបុរសជាប្ដីចេះរកនឹកវិធីបញ្ចេញកំហឹងឃើញ ខណៈអ្នកខ្លះបញ្ចេញមតិបែបលេងសើចសរសើរលើការគូររូបរបស់បុរសជាប្ដីផងដែរ៕
