សារព័ត៌មានរបស់ជប៉ុន ថ្មីៗនេះបានចេញផ្សាយករណីមួយរបស់តារាចម្រៀងម្នាក់ឈ្មោះ Taka ដែលជាមេក្រុមចម្រៀង DEEP ត្រូវបានក្រុមហ៊ុនរបស់លោកផ្អាករាល់សកម្មភាពសិល្បៈមួយរយៈ ក្រោយរូបលោកជាប់ផុងក្នុងរឿងអាស្រូវលូចអីវ៉ាន់គេ។ តារាចម្រៀងប្រុស Taka ត្រូវបានគេរកឃើញថាបានលួចដុំបាយ និង នំចំណីមួយចំនួនទៀតគិតជាប្រាក់សរុបត្រឹមប្រមាណ ១០០០ យេន (ប្រមាណជាង ៦ ដុល្លារ) ពីហាងទំនិញមួយកន្លែង។ បើតាមសាក្សីនៅកន្លែងកើតហេតុ បានឃើញ Taka បន្លំធ្វើជាគិតលុយហើយក៏យកអាហារទាំងនោះចេញពីហាងទៅ។ ដោយសារទង្វើមិនត្រឹមត្រូវរបស់លោកនេះហើយ បានធ្វើឱ្យ Taka ត្រូវប៉ូលិសហៅទៅផឹកទឹកតែដល់ប៉ុស្តិ៍។
ក្រោយការកោះហៅដល់ប៉ុស្តិ៍ តារាចម្រៀង Taka ក៏បានទទួលស្គាល់កំហុស ធ្វើការសុំទោស និង សន្យាឈប់ឱ្យមានសកម្មភាពបែបនេះទៀតហើយ។ រូបលោកបានបង់លុយថ្លៃចំណីដែលលួចទៅនោះវិញ និង បានបកស្រាយថា៖ «ខ្ញុំដឹងថារបស់ខ្លះខ្ញុំមិនទាន់បានគិតលុយទេ ប៉ុន្តែខ្ញុំភ្លេចទៅ»។ ដោយឡែក ចំពោះខាងហាងលក់ទំនិញនោះវិញ ក៏សម្រេចចិត្តមិនដាក់ពាក្យបណ្ដឹងអ្វីនោះដែរ ដោយបញ្ចប់រឿងត្រឹមបង់លុយថ្លៃអីវ៉ាន់វិញ។
យ៉ាងណាមិញ ក្រោយរឿងមួយនេះត្រូវបានផ្សព្វផ្សាយ កេរ្តិ៍ឈ្មោះមុខមាត់របស់មេក្រុមចម្រៀង DEEP រូបនេះគឺនៅតែរងការប៉ះពាល់ខ្លាំងធ្ងន់ធ្ងរ រហូតមានប្រភពមួយបានលើកឡើងថា លោក Taka គឺមានទម្លាប់លួចគេតែម្ដង។ ជាក់ស្ដែង រូបលោកធ្លាប់យកលុយគេអស់ៗពេលរើសបានកាបូបតាមផ្លូវ និង ថែមទាំងធ្លាប់លួចលុយមិត្តស្រីថែមទៀត ប៉ុន្តែចចាមអារ៉ាមមួយនេះគឺត្រូវខាងផលិតកម្មរបស់លោកចេញមកប្រតិកម្មបដិសេធភ្លាមៗ ដោយលើកហេតុផលថា ទង្វើលួចអីវ៉ាន់ក្នុងហាងគេនេះគឺដោយសារតែលោក Taka មានបញ្ហាស្ត្រេសខ្លាំង ហើយវាក៏ជាករណីដំបូងដែរដែលលោកបង្កើតកំហុសបែបនេះ៕
