នាង Iryna Zarutska ជាម៉ូដែលសញ្ជាតិអ៊ុយក្រែន ត្រូវបានបុរសជាជនអនាថាមានបញ្ហាសតិម្នាក់ចាក់សម្លាប់នៅលើរថភ្លើងនាក្រុង Charlotte រដ្ឋ North Carolina សហរដ្ឋអាមេរិក កាលពីយប់ថ្ងៃទី ២២ ខែសីហា ឆ្នាំ ២០២៥ កន្លងទៅ។
តាមសារព័ត៌មាន Telegraph នៅថ្ងៃទី ០៨ ខែកញ្ញា ឆ្នាំ ២០២៥ នេះ បានចេញផ្សាយវីដេអូស្ដែងៗនៃហេតុការណ៍ដ៏រន្ធត់មួយនេះដែលថតបានដោយកាមេរ៉ាក្នុងរថភ្លើង។ តាមរយៈកាមេរ៉ា ជនបង្កដែលស្គាល់ឈ្មោះថា Decarlos Brown Jr. អាយុ ៣៤ ឆ្នាំ ពាក់អាវ hoodie ពណ៌ក្រហម បានអង្គុយលើកៅអីរថភ្លើងម្នាក់ឯង។ តាមសភាពបុរសរូបនោះ មើលទៅដូចហត់នឿយ គ្រវីៗក្បាលនិយាយង៉ូវៗម្នាក់ឯង។
មកដល់ម៉ោងប្រមាណ ៩ និង ៥០ នាទីយប់ ម៉ូដែលស្រី Zarutska ក៏បានដើរចូលក្នុងរថភ្លើងរួចក៏អង្គុយនៅកៅអីពីមុខជនបង្ក។ Brown បានសម្លឹងមើលទៅនាង រួចមួយសន្ទុះមកក៏ទាញកាំបិតតូចមួយពីហោប៉ៅ ងើមឈរទៅចាក់ជនរងគ្រោះត្រង់-កចំនួន ៣ ដង បណ្ដាលឱ្យជនរងគ្រោះដេកដួលលើកៅអីស្លាប់ភ្លាមៗនៅនឹងកន្លែង។
ក្រោយធ្វើសកម្មភាពរួច ជនដៃដល់បានដោះអាវ រត់ចេញពីរថភ្លើង និង ទុកកាំបិតចោលក្បែរស្ថានីយ។ ទោះជាយ៉ាងណា ក្រោយកើតហេតុមិនបានប៉ុន្មាន ជនដៃដល់ឈ្មោះ Brown ក៏ត្រូវបានចាប់ខ្លួន និង បញ្ជូនទៅមន្ទីរពេទ្យសិនដើម្បីព្យាបាលរបួសដែលកើតឡើងកំឡុងពេលវាយប្រហារលើជនរងគ្រោះ។ តាមឱ្យដឹង ជនបង្កជាជនអនាថា មានប្រវត្តិកើតជំងឺផ្លូវចិត្ត និង ធ្លាប់ចេញចូលគុកច្រើនដងហើយ។ ចំពោះការវាយប្រហារលើកនេះ ក្នុងគោលបំណងអ្វីគឺមិនទាន់ដឹងឡើយ។
ងាកមកជនរងគ្រោះវិញ បើតាមការបញ្ជាក់ពីក្រុមគ្រួសាររបស់នាង Zarutska បានចាកចេញពីក្រុង Kiev ប្រទេសអ៊ុយក្រែន ដើម្បីភៀសខ្លួនមកជ្រកកោននៅអាមេរិក ក្នុងបំណងគេចចេញពីសង្គ្រាម និង កសាងជីវិតថ្មី។ នាងបានធ្វើការក្នុងហាងលក់ភីហ្សាមួយកន្លែង តែផ្ដើមជីវិតថ្មីមិនបានប៉ុន្មានផងក៏មកជួបរឿងអកុសលបែបនេះ៕
