កាលពីវេលាម៉ោងប្រមាណ ២ និង ៣០ នាទីរសៀលថ្ងៃទី ២២ ខែមេសា ឆ្នាំ ២០២៥ (ពេលវេលាក្នុងតំបន់) មានហេតុការណ៍បាញ់ប្រហារដ៏រន្ធត់មួយទៅលើក្រុមអ្នកទេសចរមួយក្រុមនៅតំបន់ Kashmir ប្រទេសឥណ្ឌា បណ្ដាលឱ្យមនុស្សជាច្រើននាក់ត្រូវបានបាត់បង់ជីវិត។
តាមរបាយការណ៍ពីប៉ូលិសឥណ្ឌាបានឱ្យដឹងថា ក្នុងហេតុការណ៍បាញ់ប្រហារខាងលើមានមនុស្សយ៉ាងហោចណាស់ ២៤ នាក់បានបាត់បង់ជីវិត ប៉ុន្តែបើតាមរបាយការណ៍ពីខាងក្នុងតំបន់បាននិយាយថា ចំនួនអ្នកស្លាប់អាចនឹងកើនដល់ ២៦ ទៅ ៣០ នាក់។ គួរឱ្យដឹងថា ហេតុការណ៍បាញ់ប្រហារនោះដែរបានកើតមានឡើងក្នុងតំបន់ទេសចរណ៍ Pahalgam ដែលមានចម្ងាយប្រមាណជា ៨៨ គីឡូម៉ែត្រពីទីក្រុង Srinagar។
តាមការចេញផ្សាយពីសារព័ត៌មានឥណ្ឌា មុនកើតហេតុគេឃើញមានខ្មាន់កាំភ្លើងប្រមាណជា ២ ទៅ ៣ នាក់នៅក្នុងតំបន់នោះដោយដំបូងឡើយពួកគេធ្វើជាសួរនាំក្រុមអ្នកទេសចរឱ្យបង្ហាញអត្តសញ្ញាណប័ណ្ណ ហើយប៉ុន្មាននាទីក្រោយមកក៏មានការបាញ់ប្រហារតែម្ដង។
ដោយក្ដីតក់ស្លុត លោកនាយករដ្ឋមន្ត្រី Narendra Modi បានធ្វើការបង្ហោះសារលើបណ្ដាញសង្គម X រៀបរាប់ថា៖ «ខ្ញុំពិតជាមិនលើកលែងទោសជាដាច់ខាតទៅលើពួកភារវករដែលបានបាញ់ប្រហារនៅតំបន់ Pahalgam, Jammu និង Kashmir។ ខ្ញុំសុំសម្ដែងការរំលែកទុក្ខចំពោះក្រុមគ្រួសារដែលបានបាត់បង់មនុស្សជាទីស្រឡាញ់របស់ពួកគេផង ហើយខ្ញុំក៏សុំបួងសួងដល់អ្នកដែលរងរបួសឱ្យឆាប់ជាសះស្បើយផងដែរ»៕
