កាលពីថ្ងៃទី ០១ ខែមេសា ឆ្នាំ ២០២៥ កន្លងទៅ ខណៈកំពុងថតកម្មវិធីមួយរបស់ទូរទស្សន៍ TVB តារាសម្ដែងប្រុសជើងចាស់វ័យ ៧៤ ឆ្នាំ Lee Lung Kei បាននិយាយទម្លាយពាក់ព័ន្ធនឹងជីវិតស្នេហារបស់លោកស្របពេលមិត្តស្រីវ័យ ៣៧ ឆ្នាំ Chris Wang Qing Xia កំពុងជាប់ឃុំឃាំងក្នុងពន្ធនាគាររយៈពេល ១ ឆ្នាំមកនេះ។
លោក Lee Lung Kei បានឱ្យដឹងថា លោកតែងតែទៅសួរសុខទុក្ខមិត្តស្រីជានិច្ចដោយក្នុងមួយខែលោកទៅ ២ ដង ដោយម្ដងៗជួបគ្នាបាន ៣០ នាទី។ ជាមួយគ្នានេះដែរ លោកបានទម្លាយរឿងដ៏រីករាយមួយដែរថា អំឡុងពេលទៅជួបមិត្តស្រីក្នុងពន្ធនាគារថ្មីៗនេះ លោកបានសម្រេចសុំនាងរៀបការហើយនាងក៏បានយល់ព្រមវិញដែរ។ លោកបាននិយាយថា៖ «កាលមុន អូនថាពិចារណារឿងរៀបការជាមួយបង ហើយឥលូវអូននៅពិចារណាទៀតអត់? រៀបការជាមួយបងមកណា? Chris Wang Qing Xia ក៏បានតបវិញថា៖ «ខ្ញុំលែងពិចារណាទៀតហើយ ខ្ញុំយល់ព្រមរៀបការនឹងបង»។
ចាប់តាំងពីទាក់ទងគ្នារហូតមកទល់ពេលនេះ តារាសម្ដែង Lee Lung Kei តែងតែត្រូវមហាជនរិះគន់ចំពោះទំនាក់ទំនងស្នេហាខុសវ័យរបស់លោក ប៉ុន្តែលោកបាននិយាយថាលោកមិនដែលខ្វល់ខ្វាយពីមតិទាំងនោះឡើយ ព្រោះលោកជាមួយមិត្តស្រីស្រឡាញ់គ្នាខ្លាំង។ ជាក់ស្ដែង អំឡុងពេលនាងជាប់ឃុំឃាំងនេះ អ្នកទាំងពីរតែងសរសេរសំបុត្រឱ្យគ្នាជាញឹកញាប់ សរុបមកដល់ពេលនេះលោកសរសេរបាន ៤១០ សំបុត្រហើយ។
ពេលខ្លះ លោកយំពេលអានសំបុត្ររបស់គូស្នេហ៍ ដែលរៀបរាប់ពីជីវិតអ្នកទាំងពីរដែលប្រឹងតស៊ូជម្នះគ្រប់បែបយ៉ាង។ ដោយឡែកចំពោះសំបុត្រដែលលោកផ្ញើទៅឱ្យសង្សារវិញនោះ លោកតែងតែសរសេរប្រាប់នាងថាលោកធ្វើអ្វីខ្លះនៅពេលថ្ងៃ លោកទៅណាខ្លះ ជួបនរណាខ្លះ ដើម្បីធានាកុំឱ្យសង្សារគិតច្រើន។ លោកភ័យខ្លាចនាងបានបញ្ហាផ្លូវចិត្តដោយពាក្យចចាមអារ៉ាមលេចឮថាលោកបោះបង់នាងចោល។
គួររំឭកថា Chris Wang Qing Xia ត្រូវបានចាប់ខ្លួនកាលពីខែកុម្ភៈ ឆ្នាំ ២០២៤ កន្លងទៅ ដោយសារនាងបានក្លែងបន្លំសញ្ញាបត្រមហាវិទ្យាល័យពីសាលាអាមេរិកពេលដាក់មកចូលរស់នៅក្នុងហុងកុង។ ក្នុងអំឡុងពេលកាត់ក្ដីកាលពីខែមិថុនា ឆ្នាំ ២០២៤ កន្លងទៅ នាងត្រូវបានកាត់ទោសឱ្យជាប់ពន្ធនាគាររយៈពេល ២៥ ខែលើបទឧក្រិដ្ឋចំនួន ៧ រួមមានការប្រើប្រាស់ឯកសារក្លែងក្លាយ ផ្ដល់ព័ត៌មានក្លែងក្លាយដើម្បីដាក់ពាក្យចូលមកហុងកុង រួមទាំងការស្នាក់នៅលើសថ្ងៃកំណត់៕
ប្រភព៖ VN Express
