ស្ត្រេសពេក! បុរសម្នាក់ លួចចូលផ្ទះគេដាក់ថ្នាំសណ្ដំម្ចាស់ផ្ទះ រួចយកម្ជុ-លបូមឈា.មលេងបន្ធូរអារម្មណ៍

រឿងហេតុដ៏ភ្ញាក់ផ្អើល និង ហួសចិត្តមួយកើតឡើងនៅក្រុង Yangzhou ខេត្ត Jiangsu ប្រទេសចិន កំពុងទទួលបានការចាប់អារម្មណ៍យ៉ាងខ្លាំងនៅប្រទេសចិន ដោយមានបុរសម្នាក់ឈ្មោះ Li បានលួចចូលផ្ទះរបស់ស្ត្រីម្នាក់ឈ្មោះ Wu ខណៈពេលដែលស្វាមីរបស់នាងមិននៅក្នុងបន្ទប់។ តាមការលើកឡើងបានឱ្យដឹងថា Li បានរុញទ្វារចូលទៅហើយឃើញ Wu កំពុងតែដេកលង់លក់តែម្នាក់ឯង។ ឃើញឱកាសល្អ Li ក៏បានយកក្រណាត់ខ្មៅដែលមានដាក់ថ្នាំសណ្ដំគ្របមុខជនរងគ្រោះឱ្យសន្លប់ រួចក៏យកម្ជុលមួយមកបូមឈាមពីដៃរបស់នាង។

យ៉ាងណាមិញ សកម្មភាពរបស់បុរសរូបនោះត្រូវបានបង្អាក់ពេលដែលស្វាមីរបស់ Wu ត្រឡប់មកវិញ ហើយក៏យកកំសៀវទឹកវាយរូបគេរហូតរត់គេចខ្លួនបាត់។ ក្រោយជនរងគ្រោះដឹងខ្លួន នាងបាននិយាយថា៖ «ខ្ញុំឃើញខ្សែចងរឹតដៃសម្រាប់បូមឈាមនៅលើគ្រែ ខ្ញុំក៏មានអារម្មណ៍ថាឈឺនៅដៃខាងឆ្វេងហើយក៏មានស្នាមម្ជុលចាក់លើដៃដែរ»។

សំណាញ់ច្បាប់ញឹក ជនសង្ស័យក៏ត្រូវបានចាប់ខ្លួនបញ្ជូនទៅតុលាការ ដោយនៅទីនោះរូបគេបានសារភាពថា អ្វីដែលគេបានធ្វើគឺដើម្បីបន្ធូរអារម្មណ៍ស្ត្រេស។ គួរឱ្យដឹងដែរថា តាមកំណត់ត្រាបទឧក្រិដ្ឋ ជនសង្ស័យគឺធ្លាប់ប្រព្រឹត្តបទល្មើសច្រើនដូចជាធ្លាប់លួចគេ រំលោភគេ លួចចូលផ្ទះគេជាដើម ហើយសម្រាប់ករណីខាងលើនេះ តុលាការបានកាត់ទោសឱ្យគេជាប់ពន្ធនាគាររយៈពេល ២ ឆ្នាំ៕

ប្រភព៖ Kenh14