រឿងរ៉ាវរបស់ស្ត្រីខ្លាំងម្នាក់នៅអាមេរិកកំពុងផ្ទុះការចាប់អារម្មណ៍ខ្លាំង ដោយរូបគាត់ត្រូវក្រុមហ៊ុនចាស់បដិសេធមិនព្រមឡើងតំណែង ចុងក្រោយសងសឹកវិញដោយការចាយលុយទិញក្រុមហ៊ុននោះ រួចបណ្ដេញមេចាស់ចេញដោយមិនស្ដាយ។
ស្ត្រីខាងលើមានឈ្មោះថា Julia Stewart អាយុ ៧០ ឆ្នាំ បច្ចុប្បន្នជា CEO ក្រុមហ៊ុន DineEquity ជាក្រុមហ៊ុនអាហារ និង ភេសជ្ជៈ មានទីតាំងនៅក្រុង Pasadena រដ្ឋ California សហរដ្ឋអាមេរិក បានទម្លាយរឿងរ៉ាវសងសឹកជាមួយក្រុមហ៊ុនចាស់ក្នុងកម្មវិធី podcast មួយកាលពីចុងខែមេសា ឆ្នាំ ២០២៥ កន្លងទៅ។
លោកស្រី Julia បានរៀបរាប់ថា កាលពីដើមឆ្នាំ ២០០០ លោកស្រីគឺជាអ្នកជំនួញស្រីដ៏ល្បីឈ្មោះម្នាក់ដែលមានសមត្ថភាពអាចធ្វើឱ្យក្រុមហ៊ុនដែលក្ស័យធនងើបឈរឡើងវិញបាន។ លោកស្រីត្រូវបានគេហៅឱ្យទៅធ្វើការនៅក្រុមហ៊ុន Applebee ដោយសន្យាថានឹងលើកលោកស្រីឡើងធ្វើជា CEO ប្រសិនបើអាចរកចំណូលឱ្យក្រុមហ៊ុនបានច្រើន។ លោកស្រីបានបង្កើតក្រុមការងារថ្មីមួយ ប្រឹងប្រឹងធ្វើការងារ រហូតទទួលបានលទ្ធផលជាទីគាប់ចិត្ត។ ក្រោយកិច្ចប្រឹងប្រែង ៣ ឆ្នាំ តម្លៃភាគហ៊ុនរបស់ក្រុមហ៊ុនបានកើនឡើងគុណនឹង ២ ទើបលោកស្រីបានទៅប្រាប់ថ្នាក់លើឱ្យបំពេញការសន្យារបស់ពួកគេកន្លងមក។
លោកស្រី Julia បាននិយាយថា៖ «ខ្ញុំគិតថាវាដល់ពេលហើយដែលខ្ញុំត្រូវឡើងធ្វើជា CEO» ប៉ុន្តែបែរជាទទួលបានចម្លើយដ៏ហួសចិត្តពី CEO និង ប្រធានក្រុមហ៊ុន ដោយឆ្លើយតបថា៖ «ទេ គឺមិនអាចទេ» និង មិនបានប្រាប់ហេតុផលមិនឡើងតំណែងឱ្យលោកស្រីឡើយ។ ក្រោយទទួលបានចម្លើយឆ្លើយតបបែបនេះ ជាជាងបង្កជម្លោះ លោកស្រី Julia ដេកគិតពេញមួយយប់ រួចក៏សម្រេចដាក់ពាក្យលាឈប់តែម្ដង។
ក្រុមហ៊ុនក៏យល់ព្រម ដោយស្នើលោកស្រី Julia ឱ្យបន្តធ្វើការប៉ុន្មានខែទៀតមុនរកបុគ្គលិកថ្មីមកជំនួសបាន។ មកដល់ឆ្នាំ ២០០៧ លោកស្រីក៏បានផ្លាស់ទៅធ្វើការនៅក្រុមហ៊ុន IHOP ដែលជាសាខាភោជនីយដ្ឋានលក់អាហារពេលព្រឹក និង ថ្ងៃត្រង់របស់អាមេរិក។ ស្ត្រីខ្លាំងរូបនេះបានចំណាយពេល ៥ ឆ្នាំនៅក្រុមហ៊ុននេះ រហូតធ្វើឱ្យក្រុមហ៊ុនដែលកំពុងជួបបញ្ហាអាចងើបឡើងវិញបាន។
ខណៈ IHOP កំពុងតែលូតលាស់ទៅមុខ លោកស្រី Julia ក៏បានដាក់ស្នើទៅថ្នាក់លើឱ្យមានការដាក់បញ្ចូលគ្នាជាមួយក្រុមហ៊ុនផ្សេងទៀតដើម្បីឱ្យក្រុមហ៊ុនកាន់តែលូតលាស់ល្បីឈ្មោះកាន់តែខ្លាំង ហើយគោលដៅក្រុមហ៊ុនដែលលោកស្រីដាក់ស្នើនោះគឺក្រុមហ៊ុនចាស់ដែលធ្លាប់ធ្វើការ Applebee នោះឯង។ លោកស្រីបាននិយាយថា៖ «ពិតណាស់ គ្មាននរណាម្នាក់ហ៊ានខ្ចីលុយ ២.៣ ពាន់លានដុល្លារ ដើម្បីយកមកសងសឹកនោះទេ តែយើងខ្ចី ២.៣ ពាន់លានដុល្លារដើម្បីទិញ Applebee»។
ក្រោយកិច្ចព្រមព្រៀងលក់ទិញបានបញ្ចប់ដោយរលូនរួចរាល់ លោកស្រី Julia ក៏បានហៅ CEO និង ប្រធានក្រុមហ៊ុន Applebee មកជួប រួចក៏ប្រកាសថា៖ «ខ្ញុំបានទិញក្រុមហ៊ុននេះ ហើយឥលូវមិនត្រូវការមេដឹកនាំ ២ នាក់នេះទៀតទេ អ្នកទាំងពីរត្រូវបានបញ្ឈប់ពីការងារហើយ»៕
