កាលពីថ្ងៃទី ១៩ ខែវិច្ឆិកា ឆ្នាំ ២០២៤ កន្លងទៅ ស្ត្រីខ្ពស់ជាងគេបំផុតលើលោក Rumeysa Gelgi កម្ពស់ ២.១៥ ម៉ែត្រ និង ស្ត្រីទាបជាងគេបំផុតលើលោក Jyoti Amege កម្ពស់ត្រឹម ៦២.៨ សង់ទីម៉ែត្រ បានជួបមុខគ្នាជាលើកដំបូងនៅទីក្រុងឡុងដុង ប្រទេសអង់គ្លេស ដើម្បីចូលរួមអបអរថ្ងៃ Guinness World Records Day 2024។
បើទោះបីជាទើបជួបស្គាល់គ្នាលើកដំបូងពិតមែន ប៉ុន្តែស្ត្រីដ៏អស្ចារ្យទាំងពីររូបនេះត្រូវរ៉ូវគ្នាខ្លាំងដោយពួកគេអង្គុយផឹកតែជជែកគ្នាលេងយ៉ាងសប្បាយរីករាយ។ តាមសម្ដីរបស់អ្នកស្រី Gelgi ជាអ្នកស្រុកតួកគីបាននិយាយថា បើទោះជាពួកគេទាំងពីរមានកម្ពស់ខុសគ្នាមេឃ និង ដី ពិតមែន ប៉ុន្តែពួកគេមានចំណុចជាច្រើនដែលដូចគ្នា។ អ្នកស្រីបានរៀបរាប់ថា៖ «ពួកយើងចូលចិត្តការផាត់មុខ មើលថែទាំខ្លួនឯង ទិញគ្រឿងអលង្ការ និង ចូលចិត្តធ្វើក្រចកដូចគ្នា»។
គួរឱ្យដឹងថា អ្នកស្រី Gelgi បច្ចុប្បន្នប្រកបអាជីពជា web designer ត្រូវបានជាប់ឈ្មោះក្នុងបញ្ជីកំណត់ត្រាពិភពលោកជាស្ត្រីខ្ពស់ជាងគេបំផុតកាលពីឆ្នាំ ២០២១។ Gelgi បានកើតមានជំងឺកម្រមួយហៅថា Weaver Syndrome ដែលធ្វើឱ្យរាងកាយរបស់នាងលូតលាស់កម្ពស់ខ្ពស់ជាងមនុស្សទូទៅធម្មតា។ នាងគឺជាមនុស្សទី ២៧ លើពិភពលោកដែលកើតមានជំងឺកម្រមួយនេះ។
ងាកមក អ្នកស្រី Amge វិញ គឺជាតារាសម្ដែងដ៏ល្បីល្បាញម្នាក់ក្នុងប្រទេសឥណ្ឌា។ នាងបានកើតមានជំងឺមួយហៅថា achondroplasia ដែលជាជំងឺប៉ះពាល់លើដៃជើងរបស់នាង ធ្វើឱ្យនាងមានកម្ពស់ទាបជាងមនុស្សទូទៅធម្មតា។ ទោះជាកាយសម្បទាមិនប្រក្រតីដូចមនុស្សទូទៅក្ដី ប៉ុន្តែ Amge ទទួលបានក្ដីស្រឡាញ់ពីមនុស្សជាច្រើនជុំវិញសកលលោក៕
