កាលពីថ្ងៃទី ០២ ខែមិថុនា ឆ្នាំ ២០២៥ កន្លងទៅ (ពេលវេលាក្នុងតំបន់) ភ្នំភ្លើងដ៏ល្បី Etna នៅប្រទេសអ៊ីតាលី បានផ្ទុះឡើងយ៉ាងខ្លាំងក្លា ជះសាយភាយឧស្ម័ន និង ផេះយ៉ាងខ្មួលខ្មាញ់ឡើងលើអាកាស ផ្អើលស្លន់ដល់អ្នកទេសចរជាច្រើននាក់នាំគ្នារត់ចែកជើងគ្នាចុះរកកន្លែងមានសុវត្ថិភាពភ្លាមៗ។
តាមវីដេអូស្ដែងៗបង្ហោះចែកចាយលើបណ្ដាញសង្គម បានបង្ហាញឱ្យឃើញមនុស្សជាច្រើននាំគ្នារត់ចុះពីលើភ្នំដើម្បីគេចពីកម្ទេចផេះ និង ថ្មដែលជះចេញពីមាត់ភ្នំភ្លើងដែលកំពុងតែផ្ទុះខ្លាំង។ បើតាមការបញ្ជាក់ពីអ្នករៀបចំ tour ម្នាក់ប្រាប់សារព័ត៌មាន CNN បាននិយាយថា ពួកគេបាននាំអ្នកទេសចរចំនួន ៤០ នាក់ឡើងលើភ្នំភ្លើង Sicilian នៅពេលដែលភ្នំចាប់ផ្ដើមផ្ទុះនោះ។
គួរឱ្យដឹងផងដែរថា ករណីផ្ទុះភ្នំភ្លើង Etna កាលពីថ្ងៃទី ០២ ខែមិថុនា ឆ្នាំ ២០២៥ កន្លងទៅនេះ គឺចាត់ទុកជាការផ្ទុះដ៏ខ្លាំងក្លាបំផុតមួយគិតតាំងពីឆ្នាំ ២០១៤ មក ដែលជាហេតុបណ្ដាលឱ្យអាជ្ញាធរក្នុងតំបន់ត្រូវចេញមុខចាត់វិធានការភ្លាមៗដើម្បីធានាដល់សុវត្ថិភាពពលរដ្ឋ៕
