កាលពីដើមខែកន្លងទៅនេះ គូស្នេហ៍មួយគូនៅប្រទេសកូរ៉េខាងត្បូងបានឈ្នះឆ្នោតកោសរង្វាន់ធំបានទឹកប្រាក់រហូតដល់ ២ ពាន់លានវ៉ុន (ប្រមាណ ១.៤ លានដុល្លារ) តែអ្វីដែលធ្វើឱ្យមហាជនជាច្រើនចាប់អារម្មណ៍ខ្លាំងនោះគឺការរៀបរាប់ពីរឿងរ៉ាវនៃការឈ្នះឆ្នោតរបស់ពួកគេទាំងពីរ។
តាមការចេញផ្សាយបានឱ្យដឹងថា គូស្នេហ៍ជនជាតិកូរ៉េខាងលើបានទិញឆ្នោតកោសពីកន្លែងលក់ឆ្នោតមួយកន្លែងនៅក្រុង Wonju ខេត្ត Gangwon ខណៈពួកគេកំពុង date ជាមួយគ្នា។ តាមការរៀបរាប់ពីបុរសជាស្វាមីដែលជាអ្នកតែងតែទិញឆ្នោតក្នុងបរិមាណតិចតួចជាប្រចាំ ដោយពេលកំពុង date ជាមួយប្រពន្ធនោះ លោកក៏បានទិញឆ្នោត Lotto មួយដែរ។ យ៉ាងណាមិញ ដោយគិតថាប្រពន្ធចូលចិត្តកោសឆ្នោត Spito 2000 លោកក៏សម្រេចចិត្តទិញឆ្នោតនោះមួយឈុតទៀតទៅ។
ភ្លាមៗ ប្រពន្ធរបស់លោកក៏បានអង្គុយកោសឆ្នោតនោះនៅក្នុងឡាន ខណៈរង់ចាំប្ដីយកអីវ៉ាន់ឱ្យគេ ដោយពេលនោះហើយជាពេលវេលាដែលធ្វើឱ្យពួកគេរីករាយខ្លាំងហួសប្រមាណក្រោយដឹងថាខ្លួនបានឈ្នះរង្វាន់ធំជាទឹកប្រាក់ ២ ពាន់លានវ៉ុន។ អ្វីដែលរឹតតែគួរឱ្យចាប់អារម្មណ៍ខ្លាំងជាងនេះទៅទៀតនោះ គឺនៅពេលស្ត្រីជាប្រពន្ធបានទម្លាយប្រាប់ប្ដីថា ថ្មីៗកន្លងទៅ រូបនាងបានយល់សប្តឃើញតារាសម្ដែង Byeon Woo Seok បានឱ្យកាដូដល់នាង ហើយនាងគិតថា Woo Seok ជាតារាសំណាងដែលឱ្យកាដូធំមួយនេះ។
តារាសម្ដែង Byeon Woo Seok
បុរសជាប្ដីបានរៀបរាប់ថា៖ «លោក (Woo Seok) បានហៅឈ្មោះប្រពន្ធខ្ញុំ ហើយក៏ហុចកាដូមួយឱ្យនាង និង ឱបនាងយ៉ាងកក់ក្ដៅថែមទៀត»។ បើទោះនេះគ្រាន់តែជំនឿរួមផ្សំ តែលោកក៏បានសម្ដែងការអរគុណចំពោះតារាសម្ដែងប្រុស Byeon Woo Seok ផងដែរ ដែលបានពាំនាំសំណាងល្អមកឱ្យក្រុមគ្រួសាររបស់លោកបែបនេះ។ លោកទម្លាយទៀតថា លោក និង ប្រពន្ធ នឹងប្រើប្រាស់លុយដែលឈ្នះឆ្នោតនេះទៅសងបំណុលគេឱ្យអស់ និង ទិញផ្ទះមួយសម្រាប់គ្រួសារជ្រកកោន៕
