នៅយប់រំលងអធ្រាត្រឈានចូលថ្ងៃទី ០២ ខែកុម្ភៈ ឆ្នាំ ២០២៥ កន្លងទៅ សំណងអគារបុរាណ Sangjeru ដែលជាអគារកម្ពស់ ៣ ជាន់សាងសង់ឡើងបែបកូរ៉េបុរាណ និង ជានិមិត្តរូបនៃភ្នំ Deogyusan នាតំបន់ Muju ខេត្ត Jeonbuk ប្រទេសកូរ៉េខាងត្បូង ត្រូវបានអគ្គិភ័យឆាបឆេះខ្ទេចអស់ទាំងស្រុងបន្សល់ត្រឹមតែគ្រោងប៉ុណ្ណោះ។
តាមនាយកដ្ឋានពន្លត់អគ្គិភ័យប្រចាំខេត្ត Jeonbuk បានឱ្យដឹងថា អគ្គិភ័យខាងលើនេះដែរបានកើតឡើងនៅវេលាម៉ោង ១២ និង ២៣ នាទីរំលងអធ្រាត្រឈានចូលថ្ងៃទី ០២ ខែកុម្ភៈ។ ខាងក្រុមពន្លត់អគ្គិភ័យគឺជួបការលំបាកជាខ្លាំងក្នុងការឡើងទៅទីតាំងឆេះ ដោយសារតែសំណង់អគារនោះស្ថិតលើកំពូលភ្នំដែលមានព្រិលធ្លាក់ខ្លាំង និង ផ្លូវធ្វើដំណើរមានថ្មរដិបរដុប។ ក្រោយមករយៈពេលប្រមាណ ១ ម៉ោង និង ៥០ នាទី ភ្លើងក៏បានរលត់អស់ទាំងស្រុង ប៉ុន្តែសំណង់អគារក៏រងការខូចខាតអស់ទាំងស្រុងដូចគ្នា។ ចំពោះមូលហេតុបង្កការឆាបឆេះទាំងកណ្ដាលយប់នៃសំណង់អគារបុរាណលើកំពូលភ្នំនេះ ខាងអាជ្ញាធរកំពុងបន្តការស៊ើបអង្កេតនៅឡើយ។
តាមសមាគមទេសចរណ៍ប្រចាំតំបន់ Muju សំណង់អគារ Sangjeru ជាអគារសាងសង់ពីឈើកម្ពស់ ៣ ជាន់បែបកូរ៉េបុរាណដែលសាងសង់ឡើងកាលពីឆ្នាំ ១៩៩៧។ សំណង់អគារមួយនេះសាងសង់នៅលើកំពូលភ្នំ Deogyusan ដើម្បីជានិមិត្តរូបនៃ Yin and Yang ក្នុងវប្បធម៌របស់កូរ៉េ។ ចំណែកភ្នំ Deogyusan វិញក៏ជាគោលដៅទេសចរណ៍ដ៏ល្បីល្បាញមួយផងដែរ ដោយភ្នំមួយនេះចាត់ទុកដូចជាភ្នំអាល់ (Alps) ប្រចាំកូរ៉េខាងត្បូង ដោយមានភ្ញៀវទេសចរជាច្រើននាក់នាំគ្នាឡើងទៅមើលព្រិលធ្លាក់ ទោះជាការឡើងលើភ្នំនោះមានភាពលំបាកអំឡុងពេលរដូវរងារក៏ដោយ៕
ប្រភព៖ Kenh14
