កាលពីថ្ងៃទី ២២ ខែសីហា ឆ្នាំ ២០២៥ កន្លងទៅ គណៈកម្មការរៀបចំកម្មវិធី Miss Universe បានចេញសេចក្ដីប្រកាសដំណឹងដ៏សោកសៅមួយថា Miss Universe ប្រចាំឆ្នាំ ១៩៦២ លោកយាយ Norma Beatriz Nolan បានទទួលមរណភាពហើយក្នុងវ័យ ៨៧ ឆ្នាំ ដោយជរាពាធ។
ក្នុងសេចក្ដីប្រកាសបានរៀបរាប់ថា៖ «ស្ថាប័ន Miss Universe ពិតជាមានការសោកសៅជាខ្លាំង និង សុំសម្ដែងការរំលែកទុក្ខចំពោះក្រុមគ្រួសារ មិត្តភក្តិ ក៏ដូចជាអ្នកដែលធ្លាប់បានឃើញដំណើរជីវិតរបស់ Miss Universe 1962, Norma Nolan។ ក្នុងនាមជាបវរកញ្ញាដំបូងបំផុតតំណាងឱ្យប្រទេសអាហ្សង់ទីនឈ្នះមកុដ Miss Universe ភាពលេចធ្លោ ស្រស់ស្អាត របស់ Norma Beatriz បានបន្សល់ទុកចារជាប្រវត្តិសាស្ត្រ និង ដំណាលចិត្តដល់ក្មេងៗជំនាន់ក្រោយឱ្យមកចូលរួមកម្មវិធីនេះ»។
គួររំឭកថា លោកយាយ Norma Beatriz Nolan បានកើតនៅថ្ងៃទី ២២ ខែមេសា ឆ្នាំ ១៩៣៨ នាក្រុង Venado Tuerto ខេត្ត Santa Fe ប្រទេសអាហ្សង់ទីន។ លោកយាយបានចាប់ផ្ដើមអាជីពជាតារាម៉ូដែលតាំងពីនៅក្មេងវ័យ រហូតមកដល់ឆ្នាំ ១៩៥៨ លោកយាយក៏បានផ្លាស់ទៅ Buenos Aires ដើម្បីបន្តអាជីពជាតារាម៉ូដែល ស្របពេលសិក្សាការងារផ្នែកលេខាធិការផងដែរ។ លោកយាយ Norma Beatriz Nolan បានឈ្នះមកុដ Miss Argentina 1962 តំណាងឱ្យប្រទេសអាហ្សង់ទីនឡើងប្រកួតកម្មវិធី Miss Universe 1962 ហើយក៏បង្កើតបានប្រវត្តិសាស្ត្រជាលើកដំបូងជូនជាតិរបស់ខ្លួន ក្លាយជាបវរកញ្ញាអាហ្សង់ទីនតែម្នាក់គត់រហូតមកដល់សព្វថ្ងៃដែលបានឈ្នះមកុដ Miss Universe៕
