កាលពីវេលាម៉ោង ៨ និង ១៧ នាទីយប់ ថ្ងៃទី ១៩ ខែវិច្ឆិកា ឆ្នាំ ២០២៥ (ពេលវេលាក្នុងតំបន់) សាឡាងមួយគ្រឿងនៅប្រទេសកូរ៉េខាងត្បូងឈ្មោះ Queen Jenuvia ដែលដឹកមនុស្សចំនួន ២៤៦ នាក់ និង បុគ្គលិក ២១ នាក់ បានជួបគ្រោះថ្នាក់បុកជាប់កឿងនៅកោះដាច់ស្រយាលតូចមួយជិតកោះ Jangsan ក្នុងតំបន់ Sinan ប្រមាណ ៣៦៦ គីឡូម៉ែត្រភាគខាងត្បូងទីក្រុងសេអ៊ូល។

សាឡាងទម្ងន់ ២៦ ៥៤៦ តោននេះដែរ គឺធ្វើដំណើរចេញពីកោះ Jeju ទៅទីក្រុង Mokpo ហើយក៏ជួបគ្រោះថ្នាក់តាមផ្លូវតែម្ដង។ តាមព័ត៌មានបានឱ្យដឹងដែរថា ក្នុងហេតុការណ៍នេះបានបណ្ដាលឱ្យមនុស្សយ៉ាងហោចណាស់ ៥ នាក់រងរបួស។ តាមការសន្និដ្ឋានដំបូង សាឡាងអាចនឹងបើកបុកកឿងនឹងផ្កាថ្មជិតកោះដាច់ស្រយាលនោះ ព្រោះឃើញមានរន្ធធ្លាយនៅផ្នែកខាងមុខសាឡាង ប៉ុន្តែមិនមានទឹកធ្លាយហូរចូលទៅខាងក្នុងនោះទេ។

ភ្លាមៗនោះដែរ ខាងក្រុមឆ្មាំសមុទ្រកូរ៉េ ក៏បានបញ្ជូនទូកល្បាតចុះទៅទីតាំងកើតហេតុដើម្បីធ្វើការសង្គ្រោះមនុស្សដែលជាប់គាំងលើសាឡាង ទៅកាន់ផែនៅក្បែរនោះ៕

