បើនិយាយដល់រឿងភាគកូរ៉េដែលផ្ទុះល្បីខ្លាំងតាំងពីភាគដំបូងដល់ភាគបញ្ចប់ «Bon Appétit, Your Majesty» គឺជារឿងភាគដែលល្អបំផុតមួយមានអ្នកទស្សនាច្រើនខ្លាំងមិនថាតែក្នុងប្រទេសកូរ៉េ ឬអន្តរជាតិនោះឡើយ។
ភាពជោគជ័យនៃខ្សែភាពយន្តភាគបុរាណលាយសម័យមួយនេះហើយ បានធ្វើឱ្យតារាសម្តែងប្រុសពន្លកថ្មី Lee Chae Min ផ្ទុះប្រជាប្រិយភាពខ្លាំង ក្លាយជាកំពូលតារាសម្ដែងជម្រើសលេខ ១ ដែលក្រុមហ៊ុនភាពយន្ត និង ផលិតកម្មក្នុងស្រុកជាច្រើនដណ្ដើមគ្នាចង់បាន។
ជាក់ស្ដែង តាមការចេញផ្សាយរបស់សារព័ត៌មានក្នុងស្រុកបានឱ្យដឹងថា តារាសម្ដែងប្រុស Lee Chae Min ក្រោយទទួលជោគជ័យជាមួយទេពកោសល្យសម្ដែងដ៏ល្អទាក់ទាញក្នុងរឿង «Bon Appétit, Your Majesty» នោះ បច្ចុប្បន្ន លោកត្រូវបានខាងបណ្ដាក្រុមហ៊ុននានាផ្ដល់សំណើរស្គ្រីបដល់ទៅ ៣០ បន្ថែមទៀតសម្រាប់ការងារបន្ទាប់ៗ។
ក្រៅពីនេះ តារាប្រុសវ័យត្រឹម ២៥ ឆ្នាំរូបនេះ ក៏ទទួលបានសំណើរដូចទឹកបាក់ទំនប់លើការថតផ្សព្វផ្សាយពាណិជ្ជកម្ម ការថតរូប photo shoots កម្មវិធីជំនួបអ្នកគាំទ្រ និង សំណើរការងារជាច្រើនផ្សេងទៀត។
គួរឱ្យដឹងថា តារាសម្ដែងប្រុស Lee Chae Min បានចាប់ប្រឡូកចូលវិស័យសម្ដែងក្នុងឆ្នាំ ២០២១ តាមរយៈជាតួអង្គសម្ដែងម្នាក់ក្នុងរឿង «High Class»។ ដល់ឆ្នាំ ២០២៣ លោកក៏កើនប្រជាប្រិយភាពមួយកម្រិត ពេលចូលរួមសម្ដែងក្នុងរឿង «Crash Course in Romance»។
Lee Chae Min ទទួលតំណែងជាតួឯកប្រុសដំបូងក្នុងរឿងភាគកូរ៉េ «Hierarchy» កាលពីឆ្នាំ ២០២៤ កន្លងទៅ និង បន្តតំណែងជាតួឯកប្រុសកក្នងរឿងកំពុងល្បី «Bon Appétit, Your Majesty» នេះ ក្រោយតារាប្រុសជ្រើសរើសជាតួឯកដំបូងត្រូវផ្លាស់ប្ដូរភ្លាមៗ ដោយសារជាប់រឿងអាស្រូវ។
គួរបន្ថែមថា Lee Chae Min នឹងត្រឡប់មកសម្ដែងជាតួអង្គរងវិញក្នុងរឿងភាគថ្មីមួយរបស់ Netflix ដែលមានចំណងជើងថា «Cashero» ដោយតួឯកប្រុសសម្ដែងដោយសមាជិកក្រុមចម្រៀង 2PM លោក Lee Jun Ho៕
