ក្រុមហ៊ុន Lonvi Boisciences ដែលមានទីតាំងនៅទីក្រុង Shenzhen ប្រទេសចិន បានធ្វើការណែនាំថ្នាំគ្រាប់ថ្មីមួយដែលផ្សំឡើងពីសារធាតុចម្រាញ់ចេញពីគ្រាប់ទំពាំងបាយជូរ អាចជួយឱ្យមនុស្សរស់នៅអាយុវែងរហូតដល់ ១៥០ ឆ្នាំ។ តាមរបាយការណ៍ព័ត៌មានពី RBC លោក Liu Qinghua ប្រធានផ្នែកបច្ចេកវិទ្យា បាននិយាយថា៖ «រស់នៅដល់អាយុ ១៥០ ឆ្នាំ គឺពិតជាអាចក្លាយជាការពិតហើយ។ ក្នុងពេលប៉ុន្មានឆ្នាំទៀត រឿងនេះនឹងក្លាយជាការពិត»។
តាមការអះអាងរបស់ក្រុមហ៊ុនខាងលើបានបញ្ជាក់ថា ពួកគេបានធ្វើតេស្តលើកណ្តុរពិសោធន៍ជាមួយរូបមន្តដែលបានផលិតនោះ ជាលទ្ធផលឃើញថា កណ្ដុរដែលពិសោធន៍នោះគឺរស់នៅ 9.៤% វែងជាងកណ្ដុរទូទៅធម្មតា និង ៦៤.២% វែងជាងថ្ងៃដំបូងនៃការពិសោធ។ គួរឱ្យដឹងថា ថ្នាំគ្រាប់ដែលផលិតនោះគឺធ្វើឡើងផ្អែកលើសមាសធាតុធម្មជាតិ procyanidin C1 (PCC1) ជាម៉ូលេគុលទាញចេញពីសារធាតុចម្រាញ់ពីគ្រាប់ទំពាំងបាយជូរ។
Lonvi Biosciences បាននិយាយថា សមាសធាតុខាងលើនេះគឺអាចបំផ្លាញកោសិកាហ្សំប៊ី (zombie cells) ដែលជាកោសិកាចាស់ៗបំផ្លាញកោសិកាល្អៗ និង ធ្វើឱ្យមនុស្សវិវឌ្ឍរកភាពចាស់នោះបាន។ «នេះមិនមែនត្រឹមជាថ្នាំគ្រាប់ធម្មតានោះទេ តែវាជាថ្នាំទិព្វ» ថ្លែងបញ្ជាក់ដោយនាយកប្រតិបត្តិ Ip Zhu។
គួរឱ្យដឹងថា ក្រុមហ៊ុន Lonvi Biosciences បានបើកដំណើរការមន្ទីរពិសោធន៍ចម្បងរបស់គេក្នុងឆ្នាំ ២០២២ ភ្លាមៗក្រោយក្រុមអ្នកស្រាវជ្រាវនៅសៀងហៃរកឃើញសមាសធាតុ PCC1។ លោក Ip Zhu បានបន្ថែមទៀតថា ដំណើរការនៃវិទ្យាសាស្ត្រពន្យារអាយុជីវិតប្រកបដោយសុខភាព គឺកាន់តែវិវឌ្ឍទៅមុខលឿនហើយរហូតដល់អាចមានសមត្ថភាពពន្យារការស្លាប់បានទៀតផង។ លោករៀបរាប់ទៀតថា ក្នុងរយៈពេល ៥ ទៅ ១០ ឆ្នាំខាងមុខ មនុស្សយើងនឹងលែងមានអ្នកប្រឈមមុខនឹងជំងឺមហារីកទៀតឡើយ។
យ៉ាងណាមិញ ខាងអ្នកជំនាញនៅអន្តរជាតិ មិនទាន់យល់ស្របទាំងស្រុងនោះឡើយ ដោយពួកគេលើកឡើងថាការអះអាងខាងលើនៅទាមទារឱ្យមានការផ្ទៀងផ្ទាត់ជាងនេះ។ ជាក់ស្ដែង តាមការលើកឡើងរបស់លោកសាស្ត្រាចារ្យ David Furman បាននិយាយថា៖ «លទ្ធផលដំបូងគឺល្អខ្លាំងហើយ ប៉ុន្តែការធ្វើតេស្តទ្រង់ទ្រាយធំគឺនៅតែចាំបាច់ត្រូវធ្វើ ដើម្បីបញ្ជាក់ឱ្យប្រាកដពីសុវត្ថិភាព និង ប្រសិទ្ធភាពរបស់វាមកលើមនុស្ស»៕
