ថ្មីៗនេះ មានករណីដ៏គួរឱ្យចាប់អារម្មណ៍មួយកើតមានឡើងនៅ aquarium មួយកន្លែងនៅក្នុងប្រទេសជប៉ុន ដោយមានសត្វត្រី Sunfish មួយក្បាលរស់នៅតែឯងក្នុងអាង សុខៗបែរជាលែងស៊ីចំណី និង តែងហែលបុកនឹងកញ្ចក់អាងជាញឹកញាប់ ក្រោយពេល aquarium នោះបានបិទលែងឱ្យភ្ញៀវចូលទស្សនាបណ្ដោះអាសន្នកាលពីខែធ្នូ ឆ្នាំ ២០២៤ កន្លងទៅ ដើម្បីធ្វើការជួសជុលឡើងវិញ។
លោក Moe Miyazaga បុគ្គលិកម្នាក់ប្រចាំ Kaikyokan Aquarium នៅក្រុង Shimonoseki ប្រទេសជប៉ុន បានបញ្ជាក់ប្រាប់កាលពីថ្ងៃទី ២១ ខែមករា ឆ្នាំ ២០២៥ កន្លងទៅថា ត្រីយក្ស Sunfish មួយក្បាលនោះបានយកពីក្រុង Kochi មកចិញ្ចឹមក្នុង aquarium នេះកាលពីខែកុម្ភៈ ឆ្នាំ ២០២៤ កន្លងទៅ។ ត្រី Sunfish នេះដែរបានក្លាយជាសត្វមួយក្បាលដែលទាក់ទាញភ្ញៀវឱ្យចូលមកកម្សាន្តក្នុងកន្លែងមួយនេះ ប៉ុន្តែសភាពរបស់វាហាក់ចាប់ផ្ដើមប្រែប្រួលត្រឹមប៉ុន្មានថ្ងៃក្រោយ aquarium បិទផ្អាកកាលពីថ្ងៃទី ០១ ខែធ្នូ ឆ្នាំ ២០២៤ កន្លងទៅ ដើម្បីធ្វើការជួសជុលរយៈពេល ៦ ខែ។
ដំបូងឡើយ អ្នកថែទាំត្រីមួយក្បាលនេះបានគិតថាវាប្រហែលជាមានបញ្ហាប្រព័ន្ធរំលាយអាហារ ដូច្នេះហើយពួកគេបានកាត់បន្ថយការឱ្យចំណីទៅវាតិចជាងមុន ហើយព្យាយាមលេងជាមួយវាកុំឱ្យវាផ្អើលពេលមានសំឡេងជួសជុលកើតមានឡើង តែយ៉ាងណាវិធីមួយនេះនៅតែមិនបានផលដដែល។ ដោយក្ដីបារម្ភ ខាងបុគ្គលិក aquarium បានធ្វើការប្រជុំគ្នា ហើយក៏មានបុគ្គលិកម្នាក់លើកគំនិតរបស់ខ្លួនថាស្ថានភាពរបស់ត្រីមួយក្បាលនោះអាចបណ្ដាលមកពីការមិនមានភ្ញៀវចូលមកទស្សនាដូចមុន ដូច្នេះពួកគេសម្រេចប្រើរាល់វិធីសាស្ត្រគ្រប់បែបយ៉ាងឱ្យតែសង្គ្រោះវាមកសភាពដើមវិញបាន។
ពួកគេបានធ្វើការព្យួរឯកសណ្ឋានបុគ្គលិកនៅខាងក្រៅកញ្ចក់អាង រួចបន្ថែមនឹងក្រដាសគូរជារូបមុខមនុស្សញញឹមសម្លឹងទៅក្នុងអាងឱ្យមើលទៅប្រៀបដូចជាមានមនុស្សមកទស្សនាវាដូចមុនដូច្នោះដែរ។ ជាលទ្ធផល សត្វត្រីមួយក្បាលនោះក៏បានចាប់ផ្ដើមស៊ីឡើងវិញ ថែមទាំងវិលមកសភាពដើមទៀតផង៕
