រឿងរ៉ាវដ៏បុកពោះ និង កម្រកើតមានមួយបានកើតឡើងនៅក្នុងប្រទេសឈីលី ដោយមានបុរសម្នាក់កំពុងអុំទូកកាយ៉ាក់លេងលើសមុទ្រសុខៗ ក៏ស្រាប់តែមានត្រីបាឡែនមួយក្បាលហាមាត់លេបបុរសនោះទាំងមនុស្សទាំងទូកចូលទៅក្នុងពោះប៉ុន្មានវិនាទីមុនខ្ជាក់ចេញមកវិញ។
តាមព័ត៌មានបានឱ្យដឹងថា ហេតុការណ៍ខាងលើបានកើតឡើងកាលពីថ្ងៃទី ០៨ ខែកុម្ភៈ ឆ្នាំ ២០២៥ កន្លងទៅ ដោយបុរសរងគ្រោះមានឈ្មោះ Adrian Simancas បានទៅអុំទូកកាយ៉ាក់លេងជាមួយឪពុកលោកឈ្មោះ Dell នៅតំបន់ Bahia El Aguila ក្បែរប៉មពន្លឺ (Lighthouse) San Isidro នាច្រកសមុទ្រ Magellan។ នៅពេលនោះហើយដេលលោក Adrian ជាមួយនឹងទូកកាយ៉ាក់ពណ៌លឿងរបស់លោកត្រូវបានត្រីបាឡែនលេបចូលពោះប៉ុន្មានវិនាទីមុនខ្ជាក់ចេញមកវិញ។
សកម្មភាពស្ដែងៗទាំងប៉ុន្មានត្រូវបានលោក Dell ជាឪពុកថតជាប់ ដោយរូបលោកស្ថិតក្នុងចម្ងាយត្រឹមប៉ុន្មានម៉ែត្រពីកូនប្រុសតែប៉ុណ្ណោះ។ អាចថាផ្លូវចិត្តរឹងមាំ លោក Dell គឺមិនបានភ័យស្លន់ស្លោអ្វីនោះឡើយ ហើយក្រោយឃើញកូនត្រូវត្រីខ្ជាក់ចេញមកវិញ លោកថែមទាំងបានស្រែកប្រាប់កូនថា «សម្រួលអារម្មណ៍ សម្រួលអារម្មណ៍» ទៀតផង។
ថ្លែងប្រាប់សារព័ត៌មាន Associated Press លោក Adrian បានរៀបរាប់ថា៖ «ខ្ញុំគិតថាខ្ញុំស្លាប់ហើយ។ ខ្ញុំគិតថាវាស៊ីខ្ញុំហើយលេបខ្ញុំចូលពោះបាត់ហើយ»។ លោកបានរៀបរាប់អារម្មណ៍ដែលលោកភ័យខ្លាចបំផុតក្នុងពេលប៉ុន្មានវិនាទីនោះ គឺពេលដែលត្រីបាឡែននោះបង្ហាញខ្លួនឡើងមកវិញ លោកភ័យថាវានឹងទៅវាយប្រហារឪពុកលោក ឬលោកអាចនឹងត្រូវស្លាប់ក្នុងទឹកដ៏ល្វឹងល្វើយនេះ។
គួរបញ្ជាក់ដែរថា ក្រោយហេតុការណ៍ លោក Adrian និង ឪពុក Dell បានធ្វើការអុំទូកឡើងមកលើគោកវិញដោយសុវត្ថិភាពដោយគ្មាននរណាម្នាក់រងរបួសអ្វីនោះឡើយ៕
