កាលពីថ្ងៃទី ១២ ខែធ្នូ ឆ្នាំ ២០២៤ កន្លងទៅ មានរឿងរ៉ាវដ៏ហួសចិត្ត និង គួរឱ្យអស់សំណើចមួយបានកើតមានឡើងនៅផ្សារ Pitt Street នាក្រុងស៊ីដនី ប្រទេសអូស្ត្រាលី ដោយមានបុរសជាអ្នកទេសចរម្នាក់បានជាប់អណ្ដាតនឹងរូបចម្លាក់ទឹកកកផ្សព្វផ្សាយផលិតផលមួយផ្ទាំងរហូតដោះលែងចេញ។
តាមរយៈវីដេអូបានបង្ហាញឱ្យឃើញថា បុរសជាអ្នកទេសចររូបនោះបានព្យាយាមធ្វើគ្រប់បែបយ៉ាងដើម្បីដកអណ្ដាតដែលជាប់នឹងដុំទឹកកកនោះ ប៉ុន្តែការព្យាយាមរបស់លោកមិនទទួលបានជោគជ័យនោះឡើយ។ ក្នុងនោះដែរ អ្នកដំណើរនៅតាមផ្លូវក៏បាននាំគ្នាព្យាយាមជួយលោកដែរ ប៉ុន្តែអណ្ដាតរបស់លោកមានការជាប់ខ្លាំងមែនទែន។ ជាមួយគ្នានោះ សន្ដិសុខស្រីម្នាក់ដែលធ្វើការក្បែរនោះក៏បានចូលមកជួយ ដោយរូបនាងបានយកទឹកក្ដៅឧណ្ហៗចាក់ពីលើអណ្ដាតដែលជាប់នោះ តែចំពោះលទ្ធផលចុងក្រោយយ៉ាងណាគឺព័ត៌មានមិនបានទម្លាយនោះទេ។
ហេតុការណ៍មួយនេះដែរ ភ្លាមៗបានក្លាយជាប្រធានបទវែកញែកដ៏ក្ដៅគគុកលើបណ្ដាញសង្គម ដោយមហាជនមួយបង្ហាញអារម្មណ៍ហួសចិត្ត និង បែបលេងសើច ខណៈមួយចំនួនទៀតក៏បង្ហាញមតិរបស់ខ្លួនថា អ្វីដែលបានកើតឡើងធ្វើឱ្យមនុស្សចាប់អារម្មណ៍នេះគឺគ្រាន់តែជាល្បិចដើម្បីផ្សព្វផ្សាយផលិតផលរបស់គេតែប៉ុណ្ណោះ៕
