កាលពីថ្ងៃទី ០៣ ខែមីនា ឆ្នាំ ២០២៥ កន្លងទៅ មានហេតុការណ៍ដ៏តក់ស្លុតមួយបានកើតមានឡើងលើផ្ទៃសមុទ្រនៃក្រុង Santa Marta ប្រទេសកូឡុំប៊ី ដោយទូកដឹកអ្នកទេសចរមួយគ្រឿងត្រូវបានភ្លើងឆាបឆេះយ៉ាងសន្ធោសន្ធៅបង្កជាការភ័យខ្លាចស្លន់ស្លោរហូតមនុស្សជាច្រើននាក់ត្រូវលោតចុះចូលសមុទ្រដើម្បីគេចរួចផុតជីវិត។
តាមរបាយការណ៍ព័ត៌មាន គេជឿថាភ្លើងចាប់ផ្ដើមឆាបឆេះឡើងដោយសារបញ្ហាអគ្គិសនីនៅម៉ាស៊ីនមួយរបស់ទូក ហើយក៏បន្តរាលដាលឆេះទៅពាសពេញទាំងទូកតែម្ដង។ វីដេអូស្ដែងៗថតបានពីទូកផ្សេងមួយទៀតបានបង្ហាញឱ្យឃើញទូកមួយគ្រឿងនោះត្រូវភ្លើងលេបត្របាក់សឹងទាំងស្រុងខណៈផ្សែងខ្មៅខ្មួលខ្មាញ់ភាយឡើងពេញមេឃ រីឯអ្នកដំណើរលើទូកវិញ ម្នាក់ៗភ័យស្លន់ស្រែកផងលោតចេញពីទូកផងគួរឱ្យរន្ធត់បំផុត។
គួរឱ្យដឹងផងដែរថា នៅលើទូកទេសចរណ៍នោះមានភ្ញៀវសរុបចំនួន ៨៩ នាក់ និង បុគ្គលិកចំនួន ៣ នាក់ ពួកគេត្រូវបានប្រាប់ឱ្យលោតចុះពីលើទូកចូលសមុទ្រ ដោយសារតែភ្លើងរាលដាលឆេះពាសពេញទូកមិនអាចគ្រប់គ្រងបាន។ ជាសំណាងល្អ មិនមាននរណាម្នាក់គ្រោះថ្នាក់ដល់អាយុជីវិតនោះឡើយដោយក្រុមសង្គ្រោះបានជួយមនុស្សពីសមុទ្របានទាំងអស់។ យ៉ាងណាមិញ ក្នុងហេតុការណ៍នេះក៏មានអ្នករងរបួសផងដែរ ដោយអ្នករបួសទាំងអស់ត្រូវបាននាំយកទៅព្យាបាលនៅ Marine Life Centre ក្នុងក្រុង Santa Marta ប្រទេសកូឡុំបី៕
