ថ្មីៗនេះ អ្នកលេងតាមបណ្ដាញសង្គមជាច្រើននាំគ្នាភ្ញាក់ផ្អើលនឹងទិដ្ឋភាពដ៏កម្រដែលហ្វូងត្រីរាប់រយក្បាលត្រូវបានឃើញហោះពេញលើអាកាសនៅសមុទ្រ Carribean។ ក្នុងវីដេអូស្ដែងៗនោះដែរ បង្ហាញឱ្យឃើញច្បាស់ៗនូវត្រីមួយហ្វូងធំត្រូវបានវាយប្រហារដោយខ្យល់កួច ទាញយកឡើងទៅលើវិលពេញមេឃប្រៀបបីដូចជាសត្វស្លាបកំពុងហោះហើរលេង។
ហេតុការណ៍ដ៏កម្រនេះដែរកើតមានឡើងនៅ Baie-Mahualt Bay នាដែនដី Guadeloupe ក្នុងសមុទ្រ Caribbean។ តាមអ្នកក្នុងតំបន់បាននិយាយថា ខ្យល់កួចគឺឧស្សាហ៍កើតមានណាស់ក្នុងតំបន់នោះ ប៉ុន្តែនេះជាលើកទីមួយហើយដែលពួកគេបានឃើញទិដ្ឋភាពដ៏ចម្លែក និង កម្រខ្លាំងបែបនេះ។
គួរឱ្យដឹងថា តាមការបញ្ជាក់ពីភ្នាក់ងារឧតុនិយមនាដែនដី Gaudeloupe គ្រោះធម្មជាតិខ្យល់កួចមួយបានកើតមានឡើងនៅសមុទ្រ Caribbean កាលពីរសៀលថ្ងៃទី ០៤ ខែឧសភា ឆ្នាំ ២០២៥ (ពេលវេលាក្នុងតំបន់) ដែលបណ្ដាលឱ្យតំបន់ដែលប៉ះពាល់រងការខូចខាត។ បច្ចុប្បន្ន ខាងអាជ្ញាធរក្នុងតំបន់កំពុងធ្វើការជួយដល់ពលរដ្ឋដើម្បីជួសជុលការខូចខាតទាំងនោះ៕
