កាលពីពេលថ្មីៗកន្លងទៅ ពិភពលោកផ្ទុះការអាណិតអាសូរជាខ្លាំងចំពោះត្រីពូជកម្រមួយក្បាលដែលរស់នៅតែក្នុងបាតសមុទ្រជ្រៅគ្មានពន្លឺថ្ងៃចូលទៅដល់ ត្រូវអ្នកវិទ្យាសាស្ត្រប្រទះឃើញជាលើកដំបូងលើផ្ទៃទឹកខាងលើ។
ត្រីមុខបិសាចឈ្មោះថា anglerfish ដែលជាត្រីពណ៌ខ្មៅ មាត់ធំពោរពេញទៅដោយធ្មេញមុតស្រួច និង មានដងវែងកណ្ដាលក្បាលមានភ្លើងភ្លឺដូចអំពូល ជាធម្មតាប្រទះឃើញរស់នៅតែនៅបាតសមុទ្រជ្រៅគ្មានពន្លឺចេញចូលចន្លោះពី ២០០ ទៅ ២០០០ ម៉ែត្រទៅក្រោម។
យ៉ាងណាមិញ អ្នកវិទ្យាសាស្ត្រដែលកំពុងធ្វើការស្រាវជ្រាវនៅតាមផ្ទៃទឹកនៃឈូងសមុទ្រកោះ Tenerife ប្រទេសអេស្ប៉ាញ មានការភ្ញាក់ផ្អើលជាខ្លាំងក្រោយពួកគេបានប្រទះឃើញសត្វសមុទ្រទឹកជ្រៅមួយប្រភេទនេះហែលឡើងមកផ្ទៃទឹកខាងលើជាលើកដំបូង។
វីដេអូនៃវត្តមានរបស់សត្វត្រីដ៏កម្រមួយប្រភេទនេះដែរ ត្រូវបានបង្ហោះលើបណ្ដាញសង្គម Instagram របស់អ្នកវិទ្យាសាស្ត្រម្នាក់ឈ្មោះ David Jara Boguna ដែលទទួលបានការចាប់អារម្មណ៍យ៉ាងខ្លាំងក្លាពីមហាជនស្ទើរពាសពេញពិភពលោក។
វត្តមាននៃត្រីមួយប្រភេទនេះឡើងមកផ្ទៃខាងលើផ្ទៃទឹក បានធ្វើឱ្យអ្នកវិទ្យាសាស្ត្រជាច្រើនផុសសញ្ញាសួរពេញក្បាល ដោយមូលហេតុនៃការឡើងមកផ្ទៃទឹកដែលមានពន្លឺថ្ងៃជះចូលដល់នេះនៅមិនទាន់មានការបកស្រាយបាននៅឡើយនោះទេ។ យ៉ាងណាមិញ អ្នកវិទ្យាសាស្ត្រក៏លើកហេតុផលខ្លះៗថា វាអាចមកពីសត្វនោះមានជំងឺ ឬក៏អាចគេចខ្លួនពីសត្វដែលតាមប្រមាញ់វាជាដើម។
ដោយឡែក អ្វីដែលធ្វើឱ្យមនុស្សជាច្រើនរំជួលចិត្តខ្លាំងបំផុតនោះ គឺវត្តមានរបស់វាឡើងមកផ្ទៃខាងលើគឺមិនបានឃើញភាពស្រស់បំព្រង ឃើញពន្លឺថ្ងៃបានយូរឡើយ វាក៏បានងាប់ទៅវិញគួរឱ្យស្រណោះបំផុត៕
