ស្ត្រីម្នាក់នៅប្រទេសចិន ត្រូវបានសង្សារសុំបែកភ្លាមៗក្រោយទូរស័ព្ទរបស់នាងភ្ជាប់អូតូចូល wifi របស់សណ្ឋាគារ បើទោះជានាងព្យាយាមអះអាងថា នាងទើបតែមកសណ្ឋាគារនោះលើកទីមួយក៏ដោយ។
ស្ត្រីខាងលើត្រូវបានស្គាល់ឈ្មោះថា Li ដោយអំឡុងថ្ងៃឈប់សម្រាកខែឧសភា រូបនាង និង មិត្តប្រុសបានទៅសណ្ឋាគារមួយនៅតំបន់ Chongqing។ ខណៈពេលដែលនាងបើកបង្ហាញ ID តាមទូរស័ព្ទដើម្បី check in មិត្តប្រុសរបស់នាងក៏ស្រាប់តែមើលឃើញថា ទូរស័ព្ទរបស់នាងបានភ្ជាប់អូតូជាមួយ wifi នៅទីនោះ។
ដោយសង្ស័យថាមិត្តស្រីខ្លួនធ្លាប់មកសណ្ឋាគារនេះជាមួយមនុស្សប្រុសផ្សេង រូបលោកនៅតែសួរជជីកដដែលៗឱ្យនាងឆ្លើយតាមត្រង់ បើទោះជារូបនាងទទូចអះអាងថានាងមិនដែលធ្លាប់មកទីនេះពីមុនក៏ដោយ ក៏សង្សាររបស់នាងនៅតែគិតថានាងមិនស្មោះហើយក៏សម្រេចចិត្តបញ្ចប់ទំនាក់ទំនងគ្នានៅទីនោះតែម្ដង។
តាមសម្ដីស្ត្រីជាសង្សារ បាននិយាយថាហេតុការណ៍មួយនេះមិនត្រឹមតែអតីតគូស្នេហ៍នាងទេដែលមិនជឿ សូម្បីតែមិត្តភក្តិរបស់នាងក៏គិតថានាងកុហកដូចគ្នា។ ដោយចង់បានភាពស្អាតស្អំឱ្យខ្លួនឯង Li បានសម្រេចស៊ើបអង្កេតហើយក៏រកឃើញថា សណ្ឋាគារដែលជាកន្លែងចាស់នាងធ្លាប់ធ្វើការពីមុនគឺបានប្រើប្រាស់ wifi មានឈ្មោះ និង password ដូចគ្នានឹងសណ្ឋាគារដែលនាងទៅជាមួយអតីតសង្សារនេះ។
នាងបានទាក់ទងទៅអតីតមិត្តប្រុសដើម្បីបកស្រាយពីរឿងនេះ ប៉ុន្តែរូបគេបានបដិសេធមិនទទួលទូរស័ព្ទនាង និង ថែមទាំង block នាងចោលគ្រប់បណ្ដាញទាក់ទងទាំងអស់ទៀតផង។ ជម្រើសចុងក្រោយ Li ក៏បានទៅ Chongqing TV ដើម្បីនិយាយពីហេតុការណ៍ដែលបានកើតឡើងចំពោះនាង។ ខាងអ្នកកាសែតក៏បានទៅកាន់កន្លែងធ្វើការចាស់របស់នាងដែរ ដើម្បីពិនិត្យ និង បញ្ជាក់ថាទូរស័ព្ទគឺអាចភ្ជាប់អូតូជាមួយនឹង wifi ប្រសិនបើព័ត៌មាន login ពីមុនដូចគ្នាពិតមែន។ ក្រោយមក ខាងអ្នកកាសែតក៏បានទៅសណ្ឋាគារដែល Li និង មិត្តប្រុសទៅនោះ ហើយក៏រកឃើញថា ទូរស័ព្ទរបស់គេពិតជាភ្ជាប់ wifi អូតូដូចជា Li ដែរមែន។
រឿងរ៉ាវរបស់ Li គឺបានទាក់ទាញចំណាប់អារម្មណ៍មហាជនជាច្រើនក្នុងប្រទេសចិន ដោយមនុស្សភាគច្រើនសម្ដែងការអាណិតចំពោះនាង និង បានរិះគន់លើអតីតមិត្តប្រុសរបស់នាងដែលមិនព្រមស្ដាប់ហេតុផលគិតវិជ្ជមានលើនាងដោយមិនពិចារណាឱ្យច្បាស់លាស់សិន៕
