ល្បិចថ្មី! ស្ត្រីម្នាក់បន្លំធ្វើភ្ញៀវចូលរួមមង្គលការគេ ដើរអំពៀរៗចូលក្នុងផ្ទះម្ចាស់កម្មវិធីលួចលុយបានជាង ៥០០ ដុល្លាររួចគេចខ្លួនបាត់

រឿងហេតុមួយកើតមានឡើងក្នុងប្រទេសម៉ាឡេស៊ីដែលចាត់ទុកជាមេរៀនគួរឱ្យប្រុងប្រយ័ត្ន ដោយមានស្ត្រីម្នាក់បានបន្លំខ្លួនធ្វើជាភ្ញៀវចូលរួមក្នុងពិធីមង្គលការគេ ហើយដើរអំពៀរៗចូលទៅដល់ក្នុងផ្ទះរួចលួចយកលុយកូនក្រមុំកូនកំលោះអស់រាប់រយដុល្លារ មុនដើរចេញគេចខ្លួនបាត់ទៅ។

រឿងហេតុខាងលើនេះដែរបានកើតមានឡើងតាំងពីថ្ងៃទី ០១ ខែកុម្ភៈ ឆ្នាំ ២០២៥ កន្លងទៅនៅរដ្ឋ Kelantan ប្រទេសម៉ាឡេស៊ី ដោយតាមការរៀបរាប់ពីបងប្រុសថ្លៃរបស់កូនក្រមុំបានឱ្យដឹងថា ខណៈក្រុមគ្រួសារទាំងសងខាងកំពុងរវល់ជាមួយកម្មវិធី ចោរស្រីរូបនោះក៏បានលួចចូលទៅក្នុងផ្ទះដោយបន្លំធ្វើដូចជាខ្លួនឯងជាភ្ញៀវដើររកបន្ទប់ទឹក។

ពេលចូលដល់ក្នុងផ្ទះ ខណៈគ្មាននរណាម្នាក់ចាប់អារម្មណ៍ ចោរស្រីនោះក៏បានលួចកាបូបមួយពីលើទូដោយក្នុងកាបូបមានលុយប្រមាណ ២៥០០ រ៉ីងហ្គីដ (ប្រមាណ ៥៥៨ ដុល្លារ) ហើយក៏ដើរចេញវិញគេចខ្លួនបាត់ទៅ។ សកម្មភាពទាំងប៉ុន្មានរបស់ស្ត្រីជាចោរត្រូវបានកាមេរ៉ាសុវត្ថិភាពថតជាប់ទាំងអស់។

វីដេអូនោះដែរ ត្រូវបានខាងជនរងគ្រោះបង្ហោះលើបណ្ដាញសង្គមដោយទទួលបានការចាប់អារម្មណ៍យ៉ាងខ្លាំងពីមហាជនជាច្រើន។ ភាគីខាងជនរងគ្រោះធ្វើការបង្ហោះវីដេអូនេះដែរ ក្នុងបំណងឱ្យមហាជនជួយចែកចាយបន្តដើម្បីស្វែងរកមុខចោរស្រីរូបនោះឱ្យយកលុយមកឱ្យពួកគេវិញ។ ក្នុងនោះដែរ ខាងបងថ្លៃកូនក្រមុំក៏បានសរសេរសារផ្ដាំទៅចោរផងដែរថា រូបគេអាចយកលុយឱ្យវិញដោយមិនចេញមុខក៏បាន ឬទុកលុយនៅក្រៅផ្ទះចោលក៏បាន បើមិនចង់ជួបគ្នា៕