កាលពីថ្ងៃទី ០២ ខែមេសា ឆ្នាំ ២០២៥ កន្លងទៅ (ពេលវេលាក្នុងតំបន់) លោកប្រធានាធិបតីអាមេរិក ដូណាល់ ត្រាំ បានធ្វើសន្និសីទកាសែតមួយហៅថា «Make America Rich Again» នៅទីធ្លា Rose Garden ក្នុងសេតវិមាន White House ដោយរូបលោកបានប្រកាសថាជាថ្ងៃមួយក្នុងចំណោមថ្ងៃដែលសំខាន់បំផុតក្នុងប្រវត្តិសាស្ត្រអាមេរិក ពេលលោកប្រកាសដាក់ពន្ធទ្រង់ទ្រាយធំលើដៃគូពាណិជ្ជកម្មពិភពលោក។
តាមសេចក្ដីប្រកាសផែនការដាក់ពន្ធថ្មីនេះដែរ លោក ដូណាល់ ត្រាំ បានកំណត់យកពន្ធនាំចូលយ៉ាងតិច ១០% លើសឹងគ្រប់ទំនិញទាំងអស់ដែលនាំចូលអាមេរិក។ តាមសារព័ត៌មាន BBC បានចេញផ្សាយថា ពន្ធ ១០% នឹងចាប់ផ្ដើមអនុវត្តនៅថ្ងៃទី ០៥ ខែមេសា ខណៈពន្ធខ្ពស់ជាង ១០% ដែលដាក់ចេញលើបណ្ដាប្រទេសដទៃផ្សេងទៀតនឹងអនុវត្តចាប់ពីថ្ងៃទី ០៩ ខែមេសា ឆ្នាំ ២០២៥ ទៅ។
បើតាមតារាងដែលលោក ដូណាល់ ត្រាំ លើកបង្ហាញឃើញថា ប្រទេសកម្ពុជាយកពន្ធលើសគេទាំងអស់គឺ ៤៩% ដោយបន្ទាប់មកគឺប្រទេសឡាវចំនួន ៤៨% និង វៀតណាម ៤៦%៕
