លោកយាយវ័យ ៨២ ឆ្នាំម្នាក់ លេបកង្កែបរស់អស់ ៨ ក្បាល ព្រោះជឿតាមវិធីសាស្ត្របុរាណ អាចជួយព្យាបាលបញ្ហាឈឺខ្នង

លោកយាយចំណាស់អាយុ ៨២ ឆ្នាំម្នាក់ក្នុងប្រទេសចិន បានធ្វើឱ្យមហាជនភ្ញាក់ផ្អើលខ្លាំង នៅពេលដឹងថាគាត់បានលេបកង្កែបរស់ដល់ទៅ ៨ ក្បាល ព្រោះតែជឿតាមវិធីសាស្ត្របុរាណថា វាជួយព្យាបាលបញ្ហាឈឺខ្នង។

តាមព័ត៌មានបានឱ្យដឹងថា ស្ត្រីចំណាស់ខាងលើមានឈ្មោះ Zhang រស់នៅក្នុងខេត្ត Zhejiang ប្រទេសចិន ត្រូវបានបញ្ជូនទៅមន្ទីរពេទ្យនៅ Hangzhou កាលពីដើមខែកញ្ញាកន្លងទៅ ក្រោយគាត់កើតមានអាការចុកពោះខ្លាំង។

ទៅដល់មន្ទីរពេទ្យ កូនប្រុសរបស់លោកយាយបានប្រាប់គ្រូពេទ្យថា លោកយាយកើតមានបញ្ហាលៀនឌីសឆ្អឹងខ្នងច្រើនឆ្នាំហើយ ដោយគាត់ឮថា លេបកង្កែបរស់អាចជួយបន្ថយការឈឺចាប់បាន គាត់ក៏បានទៅប្រាប់សាច់ញាតិឱ្យចាប់កង្កែបប៉ុនៗបាតដៃមួយចំនួនមក តែមិនប្រាប់សាច់ញាតិថាយកធ្វើអ្វីឡើយ។ ពេលយកមកដល់ផ្ទះ គាត់មិនបានចម្អិនកង្កែបទាំងនោះឡើយ ដោយចាប់ ៣ ក្បាលទាំងរស់លេបចូលពោះតែម្ដងនៅថ្ងៃទី ១ និង លេប ៥ ក្បាលទៀតនៅថ្ងៃបន្ទាប់។

ដំបូងឡើយ គាត់គ្រាន់មានអារម្មណ៍មិនស្រួលក្នុងក្រពះតិចតួច ប៉ុន្តែការឈឺចាប់ក៏កើនឡើងនៅថ្ងៃបន្ទាប់ៗ រហូតទាល់ទ្រាំលែងបាន ទើបគាត់ព្រមប្រាប់សាច់ញាតិថា គាត់លេបកង្កែបរស់។

នៅមន្ទីរពេទ្យ គ្រូពេទ្យបានរកឃើញថា លោកយាយមានឆ្លងប៉ារ៉ាស៊ីត ដែលធម្មតាកើតមានលើអ្នកហូប ឬប៉ះពាល់ជាមួយកង្កែបរស់ ឬពស់។ ក្រោយទទួលការព្យាបាលបាន ២ សប្ដាហ៍ លោកយាយក៏ត្រូវបានអនុញ្ញាតឱ្យត្រឡប់ទៅផ្ទះវិញ៕