ស្ត្រីជនជាតិជប៉ុនវ័យចំណាស់ម្នាក់ បានបាត់បង់ប្រាក់ខ្ទង់ ១ លានយេន (៦ ៧២៩ ដុល្លារ) លើជនឆបោកតាមអនឡាញម្នាក់ដែលមកប្រាប់គាត់ថារូបគេជាអវកាសយានិកកំពុងជាប់គាំងលើទីអវកាស និង ត្រូវការអុកស៊ីហ្សែនជំនួយបន្ទាន់។
តាមព័ត៌មានបានឱ្យដឹងថា លោកយាយខាងលើមានអាយុ ៨០ ឆ្នាំ ត្រូវបានបុរសតាមអនឡាញម្នាក់ល្បួងឱ្យផ្ញើប្រាក់ទៅឱ្យគេដើម្បីទិញអុកស៊ីហ្សែន ព្រោះតែរូបគេកំពុងជាប់គាំងលើអវកាស។ តាមការរៀបរាប់របស់ប៉ូលិសនៅ Hokkaido លោកយាយជាជនរងគ្រោះបានស្គាល់បុរសនោះតាមបណ្ដាញសង្គម កាលពីខែកក្កដា កន្លងទៅ។ រូបគេអះអាងថាខ្លួនជាអវកាសយានិក និង ព្យាយាមល្បួងបង្កើតទំនាក់ទំនងស្នេហាជាមួយលោកយាយ។
ក្រោយមក ជនឆបោករូបនោះក៏បានប្រាប់ជនរងគ្រោះថា រូបគេកំពុងជាប់គាំងក្នុងយានអវកាសឥលូវនេះ និង កំពុងរងការវាយប្រហារ ហើយត្រូវការអុកស៊ីហ្សែនជំនួយបន្ទាន់។ គេបានល្បួងឱ្យលោកយាយផ្ញើប្រាក់ដើម្បីទិញអុកស៊ីហ្សែន ហើយដោយការទុកចិត្តជឿ លោកយាយក៏បានផ្ញើប្រាក់ទៅសរុបចំនួនជាង ៦ ពាន់ដុល្លារ។
តាមសារព័ត៌មានក្នុងតំបន់បានបញ្ជាក់ដែរថា លោកយាយជាជនរងគ្រោះ ជាមនុស្សរស់នៅតែម្នាក់ឯង ហើយក្រោយស្គាល់បុរសតាមអនឡាញនោះ សន្ទនាគ្នាចុះឡើងក៏មានអារម្មណ៍ស៊ីជម្រៅរហូតទុកចិត្តខ្លាំងបែបនេះ៕
ប្រភព៖ 9GAG
