បើនិយាយដល់ដំរីនៅសួនសត្វភ្នំតាម៉ៅ ដំរីញីឈ្មោះ Lucky គឺជាដំរីមួយក្បាលដ៏ល្បី និង ឆ្លាតវៃខ្លាំង មានសមត្ថភាពច្រើនរាប់តាំងពីចេះរាំ ចេះដោះមួក ចេះទាត់បាល់ និង ចេះយកលុយពីភ្ញៀវដែលចូលទស្សនាជាដើម។ ការធំធាត់ឡើងជាមួយសុខភាពល្អ និង ចេះបញ្ចេញសមត្ថភាពគ្រប់បែបយ៉ាងនេះដែរ គឺក្រោមការមើលថែដិតដល់ និង ពោរពេញដោយក្ដីស្រឡាញ់ពីសំណាក់ម្ចាស់របស់នាង គឺលោក ទ្រី ស៊ីថេង។
ប្រិយមិត្តដែលចូលចិត្តសត្វ និង តែងតែតាមដានគណនីរបស់លោក ទ្រី ស៊ីថេង ប្រាកដណាស់តែងតែបានឃើញសកម្មភាពរបស់លោក និង ដំរី Lucky ជានិច្ច ប៉ុន្តែឥលូវនេះ គ្រប់គ្នាអាចនឹងលែងឃើញសកម្មភាពរបស់អ្នកទាំងពីរជាមួយគ្នាទៀតហើយ ដោយសារតែលោក ទ្រី ស៊ីថេង បានសម្រេចចិត្តលាឈប់ពីកន្លែងដែលលោកស្រឡាញ់ និង ធ្វើដោយបេះដូងអស់រយៈពេលជាង ៣០ ឆ្នាំមកនេះ។
អ្វីដែលរឹតតែធ្វើឱ្យមហាជនកម្ពុជាជាច្រើនរំជួលចិត្តកាន់តែខ្លាំងរហូតទប់ទឹកភ្នែកមិនជាប់នោះ គឺនៅថ្ងៃដែលលោក ទ្រី ស៊ីថេង ចាកចេញ គឺឃើញដំរី Lucky បានរត់ផងស្រែកយំផងតាមម៉ូតូរបស់លោកឃាំងនៅពីមុខហាក់បង្ហាញពីអារម្មណ៍មិនចង់ឱ្យម្ចាស់របស់ខ្លួនចាកចោលទៅឡើយ។
វីដេអូដែលលោក ទ្រី ស៊ីថេង បានបង្ហោះនោះដែរ ទទួលបានការបញ្ចេញមតិ និង ចែករំលែករាប់ពាន់នាក់ ដោយមហាជនភាគច្រើនគឺបង្ហាញក្ដីអាណិតចំពោះ Lucky ហើយក៏បង្ហាញក្ដីស្រឡាញ់ចំពោះលោក ទ្រី ស៊ីថេង ដោយសំណូមពរលោកកុំលាឈប់ និង ចាកចោលពី Lucky អី៕
