មានករណីដ៏ហួសចិត្តមួយបានកើតឡើងក្នុងប្រទេសម៉ាឡេស៊ី ដោយក្មេងប្រុសអាយុ ១៣ ឆ្នាំម្នាក់ ដើរជាន់អាចម៍ឆ្មាប្រឡាក់ស្បែកជើងរួចកកិចកកុចមិនចង់ទៅសាលារៀន ក៏កើតគំនិតប្រឌិតរឿងឡើងថាមានគេរកចាប់ជំរិតហើយក៏ទៅដាក់ពាក្យប្ដឹងប៉ូលិសកាលពីថ្ងៃទី ១១ ខែកញ្ញា ឆ្នាំ ២០២៥ កន្លងទៅ។
តាមសារព័ត៌មាន Sinar Harian បានឱ្យដឹងថា កាលពីវេលាម៉ោង ៩ និង ២២ នាទីព្រឹកថ្ងៃទី ១១ ខែកញ្ញា ឆ្នាំ ២០២៥ ប៉ុស្តិ៍ប៉ូលិសសង្កាត់ Shah Alam បានទទួលរបាយការណ៍ក្លែងក្លាយមួយដោយថា ក្មេងប្រុសជាសិស្សវ័យ ១៣ ឆ្នាំម្នាក់អះអាងថាខ្លួនមានគេចង់ចាប់ជំរិតខណៈកំពុងដើរទៅសាលារៀន មុនពេលប្រាប់ឪពុកពីបញ្ហានេះ។
តាមការរៀបរាប់របស់មេប៉ូលិសនៅប៉ុស្តិ៍សង្កាត់ Shah Alam បានឱ្យដឹងថា៖ «កូនសិស្សនោះ និង ឪពុករបស់គេ បានបង្ហាញខ្លួននៅផ្នែកស៊ើបអង្កេតឧក្រិដ្ឋកម្មនាទីស្នាក់ការកណ្ដាលប៉ូលិសសង្កាត់ Shah Alam ដោយមកផ្ដល់ចម្លើយពាក់ព័ន្ធនឹងករណីប៉ុនប៉ងចាប់ជំរិត។ យ៉ាងណាមិញ និយាយចុះនិយាយឡើង ខាងភ្នាក់ងារសួរនាំក៏រកឃើញថាការរាយការណ៍របស់ជនរងគ្រោះនោះគឺជារឿងប្រឌិតឡើងទាំងស្រុង។ ក្មេងប្រុសដែលថាខ្លួនជាជនរងគ្រោះនោះបានសារភាពថា តាមពិតរូបគេប្រឌិតរឿងឡើងដើម្បីកុហកឪពុក ព្រោះមិនចង់ទៅសាលារៀនដោយសារជាន់អាចម៍ឆ្មាប្រឡាក់ស្បែកជើង»។
ក្រោយទទួលបានចម្លើយពិត ខាងក្រុមភ្នាក់ងារស៊ើបអង្កេតគឺមិនបានដេញដោលស៊ើបសួរអ្វីទៀតឡើយ ដោយគ្រាន់តែធ្វើការណែនាំព្រមានទៅកាន់ក្មេងប្រុសនោះ រួមជាមួយឪពុករបស់គេ៕
