រើសបានដុំមាសជាង ២ គីឡូ គិតជាលុយជិត ៣០ ម៉ឺនដុល្លារ តែសុខចិត្តប្រគល់ឱ្យប៉ូលិសប្រកាសរកម្ចាស់វិញ ព្រោះមូលហេតុមួយ

បុរសវ័យក្មេងម្នាក់ក្នុងប្រទេសចិនឈ្មោះ Xiao Xie ជួបលាភសំណាងប្រទះឃើញមាសមួយដុំទម្ងន់ជាង ២ គីឡូ បើគិតជាប្រាក់ជាង ២៨ ម៉ឺនដុល្លារនៅតាមផ្លូវក្នុងក្រុង Shenzhen ប៉ុន្តែដោយសារទឹកចិត្តស្មោះត្រង់មិនលោភលន់ លោកក៏បានរើសដុំមាសនោះយកទៅប្រគល់ឱ្យប៉ូលិស ដើម្បីស្វែងរកម្ចាស់ដែលធ្វើជ្រុះបាត់។

Xiao Xie អាយុ ១៧ ឆ្នាំ ជាអ្នកធ្វើការខាងដឹកជញ្ជូនឱ្យក្រុមហ៊ុនមួយ។ លោកបាននិយាយថា៖ «ដុំមាសនោះគឺធ្ងន់ណាស់។ នៅពេលនោះ ខ្ញុំគ្រាន់តែគិតថា អ្នកដែលបាត់វាបែបកំពុងបារម្ភខ្លាំងហើយ អ៊ីចឹងខ្ញុំក៏យកទៅឱ្យប៉ូលិសតែម្ដងទៅ»។

ប៉ូលិស Hou Guodong ទទួលបានដុំមាស រួចក៏បានទាញកាមេរ៉ា និង ប្រើប្រាស់មេក្រូប្រកាសស្វែងរកម្ចាស់។ ប៉ុន្មានម៉ោងក្រោយមក ម្ចាស់មាសក៏បានមកដល់ បង្ហាញឯកសារទិញមាសមកបញ្ជាក់ថាជាម្ចាស់ពិតប្រាកដ។ ម្ចាស់មាសក៏បានផ្ដល់ប្រាក់ ១ ពាន់យ័នឱ្យទៅ Xiao Xie ជាការអរគុណដែរ តែត្រូវបានកំលោះសង្ហារូបនេះបដិសេធមិនទទួលយកឡើយ។

Xiao Xie ជាអ្នកក្រុង Chaoshan ខេត្ត Guangdong ដោយលោកធ្វើការជាអ្នកដឹកជញ្ជូនឱ្យហាងមួយកន្លែងនៅក្រុង Shenzhen។ តាមការបញ្ជាក់ពីអ្នកគ្រប់គ្រងហាងបានឱ្យដឹងថា Xiao Xie ទើបមកធ្វើការងារនេះមែន ប៉ុន្តែរូបគេតែងតែទទួលខុសត្រូវ និង ដឹកជញ្ជូនបានទាន់ពេលវេលាជានិច្ច។ ចំពោះអំពើល្អរបស់ Xiao Xie នេះ ខាងតំណាងក្រុមហ៊ុននឹងផ្ដល់ជារង្វាន់លើកទឹកចិត្តដល់គេផងដែរ៕