កាលពីរសៀលថ្ងៃទី ១៤ ខែតុលា ឆ្នាំ ២០២៥ កន្លងទៅ (ពេលវេលាក្នុងតំបន់) រថយន្តក្រុងដឹកអ្នកដំណើរ ៥៧ នាក់មួយគ្រឿង ធ្វើដំណើរចេញពីក្រុង Jaisalmer ទៅទីក្រុង Jodhpur រដ្ឋ Rajasthan ភាគខាងលិចប្រទេសឥណ្ឌា បានជួបហេតុការណ៍ឆាបឆេះខណៈកំពុងធ្វើដំណើរតាមផ្លូវ បណ្ដាលឱ្យមនុស្សយ៉ាងហោចណាស់ ២០ នាក់ត្រូវបាត់បង់ជីវិត។
បើតាមលោក Rajesh Meena ជាមន្ត្រីប៉ូលិសក្នុងតំបន់ម្នាក់បានឱ្យដឹងថា អ្នកដំណើរលើឡានចំនួន ១៩ នាក់បានបាត់បង់ជីវិតនៅនឹងកន្លែង និង ជនរងគ្រោះម្នាក់ទៀតបានបាត់បង់ជីវិតនៅតាមផ្លូវទៅមន្ទីរពេទ្យ ដោយសារតែរបួសធ្ងន់ធ្ងរពេក។ ដោយឡែក អ្នកដំណើរចំនួន ១៥ នាក់ផ្សេងទៀត ក្នុងនោះរួមមានក្មេងៗចំនួន ២ នាក់ រងការរលាកធ្ងន់ធ្ងរ ខ្លះរលាករាងកាយរហូត ៧០%។
ចំពោះមូលហេតុបណ្ដាលឱ្យឆាបឆេះរថយន្តក្រុងនេះវិញ បើតាមប្រភពអនាមិកពីប៉ូលិសមួយបានលើកឡើងថា ភ្លើងអាចនឹងចាប់ផ្ដើមឆាបឆេះឡើងចេញពីចរន្តភ្លើងក្នុងឡាន៕
