កាលពីយប់ថ្ងៃទី ២៩ ខែមករា ឆ្នាំ ២០២៥ (ពេលវេលាក្នុងតំបន់) មានហេតុការណ៍ដ៏រន្ធត់មួយបានកើតមានឡើងក្បែរព្រលានយន្តហោះក្រុង Washington សហរដ្ឋអាមេរិក ដោយយន្តហោះដឹកអ្នកដំណើររបស់ក្រុមហ៊ុន American Airlines មួយគ្រឿងបានបុកគ្នាពេញទំហឹងជាមួយឧទ្ធម្ភាគចក្រយោធារហូតដាច់ជាកំណាត់ៗធ្លាក់ចូលទៅក្នុងទន្លេនៅក្បែរនោះ។
លោក John Donnelly ប្រធាននាយកដ្ឋានពន្លត់អគ្គិភ័យ និង សេវាវេជ្ជសាស្ត្រសង្គ្រោះបន្ទាន់ប្រចាំក្រុង Washington បានថ្លែងបញ្ជាក់កាលពីថ្ងៃទី ៣០ ខែមករា ឆ្នាំ ២០២៥ កន្លងទៅថា ក្នុងហេតុការណ៍បុកគ្នារវាងយន្តហោះដឹកអ្នកដំណើរ និង ឧទ្ធម្ភាគចក្រយោធានេះ ពួកគេមិនរំពឹងថានឹងរុករកឃើញអ្នកដែលនៅមានជីវិតនោះឡើយ។
តាមការបញ្ជាក់ពីលោក Donnelly ដដែលបានឱ្យដឹងទៀតថា សាកសពមនុស្ស ២៨ នាក់ត្រូវបានរកឃើញហើយ ដោយក្នុងនោះ ២៧ នាក់ជាអ្នកដំណើរលើយន្តហោះ American Airlines និង ម្នាក់រកឃើញពីឧទ្ធម្ភាគចក្រយោធា Black Hawk។
គួរឱ្យដឹងថា យន្តហោះ American Airlines ដឹកអ្នកដំណើរសរុប ៦៤ នាក់ ខណៈឧទ្ធម្ភាគចក្រយោធាមានមនុស្ស ៣ នាក់។ តាមការរៀបរាប់នៅកន្លែងកើតហេតុ តួយន្តហោះត្រូវបានប្រទះឃើញដាំក្បាលចុះក្រោម និង បែកចេញជា ៣ កំណាត់ធ្លាក់ចូលក្នុងទឹកជម្រៅត្រឹមចង្កេះ។
ចំពោះប្រអប់ខ្មៅយន្តហោះ ខាងក្រុមជ្រមុជទឹកបានរកឃើញហើយ នេះបើតាមការចេញផ្សាយរបស់សារព័ត៌មាន CBS News ហើយបច្ចុប្បន្នខាងក្រុមសង្គ្រោះនៅបន្តរុករកជនរងគ្រោះបន្ថែម ស្របពេលខាងអាជ្ញាធរកំពុងដាក់ការស៊ើបអង្កេតរកមូលហេតុបង្កឱ្យមានការប៉ះទង្គិចគ្នាលើអាកាសនេះ៕
