កាលពីថ្ងៃទី ២៩ ខែមេសា ឆ្នាំ ២០២៥ កន្លងទៅ មានហេតុការណ៍អគ្គិភ័យដ៏ខ្លាំងក្លាមួយបានឆាបឆេះភោជនីយដ្ឋានមួយកន្លែងនៅភាគឦសានប្រទេសចិន បណ្ដាលឱ្យមនុស្ស ២២ នាក់បានស្លាប់ និង ៣ នាក់ផ្សេងទៀតរងរបួស។
តាមព័ត៌មានបានឱ្យដឹងថា ភ្លើងបានឆាបឆេះឡើងនៅម៉ោងប្រមាណ ១២ និង ២៥ នាទីថ្ងៃត្រង់ (ពេលវេលាក្នុងតំបន់) ក្នុងក្រុង Liaoyang ខេត្ត Liaoning។ មកដល់ម៉ោង ២ រសៀល ក៏ទទួលបានរបាយការណ៍ថាមានមនុស្ស ២២ នាក់បានស្លាប់ និង ៣ នាក់របួស នេះបើតាមការចេញផ្សាយពីទូរទស្សន៍ជាតិចិន CCTV។ យ៉ាងណាមិញ ចំពោះមូលហេតុបង្កឱ្យមានភ្លើងឆេះនេះដែរ ខាងទូរទស្សន៍មិនបានបញ្ជាក់ប្រាប់នោះឡើយ។
ករណីអគ្គិភ័យដ៏អាក្រក់នេះដែរ បានបណ្ដាលឱ្យលោកប្រធានាធិបតី Xi Jinping ចេញមុខអំពាវនាវឱ្យមានការខិតខំព្យាបាលអ្នកដែលរងរបួស ដោះស្រាយជូនអ្នកដែលបានស្លាប់ឱ្យបានត្រឹមត្រូវ និង ផ្ដល់ការឧបត្ថម្ភដល់ក្រុមគ្រួសារជនរងគ្រោះ។ ស្វែងរកមូលហេតុបង្កឱ្យមានអគ្គិភ័យឱ្យបានលឿនតាមដែលអាចធ្វើបាន និង ដោះស្រាយទៅតាមច្បាប់៕
ប្រភព៖ Independent
