ថ្មីៗនេះ មានករណីដ៏រន្ធត់មួយកើតឡើងក្នុងប្រទេសឥណ្ឌូនេស៊ី ដោយសាឡាងដ៏ធំមួយគ្រឿងឈ្មោះ KM Barcelona VA ដឹកភ្ញៀវជាង ២៨០ នាក់ កំពុងធ្វើដំណើរឆ្ពោះទៅទីក្រុង Manado បានកើតមានអគ្គិភ័យឆាបឆេះសាឡាងទាំងស្រុងយ៉ាងសន្ធោសន្ធៅបណ្ដាលឱ្យភ្ញៀវទាំងអស់ភ័យស្លន់នាំគ្នាលោតចុះចូលក្នុងទឹកស្រែករកគេឱ្យជួយ។
តាមវីដេអូស្ដែងៗនៅពេលកើតហេតុ បង្ហាញឱ្យឃើញអ្នកដំណើរជាច្រើនខ្លះមានពាក់អាវពោងសុវត្ថិភាព ខ្លះក៏គ្មាន បានប្រថុយជីវិតលោតចូលទៅក្នុងសមុទ្រដើម្បីគេចពីអណ្ដាតភ្លើង។ សម្រែកស្រែកឱ្យជួយឮទ្រហឹងគ្រប់ទិសទី ខណៈព្រះអគ្គីកំពុងតែលេបត្របាក់សាឡាងទាំងស្រុងជះអណ្ដាតភ្លើង និង ផ្សែងខ្មួលខ្មាញ់គួរឱ្យរន្ធត់ជាទីបំផុត។
ភ្លាមៗ ទូកនេសាទជាច្រើនដែលនៅក្បែរនោះក៏បានស្ទុះស្ទាទៅកន្លែងកើតហេតុដើម្បីជួយជនរងគ្រោះ។ បើតាមរបាយការណ៍ពី IDN Times បានឱ្យដឹងថា ក្នុងហេតុការណ៍នេះមានមនុស្សម្នាក់បានបាត់បង់ជីវិត ប៉ុន្តែមិនបានបញ្ជាក់ថាស្លាប់ដោយការលង់ទឹក ឬដោយសារភ្លើងនោះឡើយ។ ដោយឡែក ក្រុមសង្គ្រោះក៏កំពុងខ្នះខ្នែងក្នុងការស្វែងរកជនរងគ្រោះដែលកំពុងបាត់ខ្លួនផងដែរ៕
