កាលពីថ្ងៃទី ០៥ ខែសីហា ឆ្នាំ ២០២៥ កន្លងទៅ ទីក្រុង Dharali នៅតំបន់ភ្នំហិមាល័យ រដ្ឋ Uttarakgand ប្រទេសឥណ្ឌា ជួបប្រទះគ្រោះរអិលបាក់ដីដ៏អាក្រក់គ្របដណ្ដប់ផ្ទះសម្បែងប្រជាពលរដ្ឋ បណ្ដាលឱ្យមនុស្ស ៤ នាក់បានស្លាប់ ខណៈ ១០០ នាក់ផ្សេងទៀតរងរបួស។
តាមរយៈវីដេអូស្ដែងៗនៃគ្រោះធម្មជាតិដ៏អាក្រក់នេះដែរ បានបង្ហាញឱ្យឃើញទឹកលាយជាមួយភក់ហូរខ្មួលខ្មាញ់យ៉ាងគំហុកពីលើភ្នំ មកគ្របដណ្ដប់លើផ្ទះពលរដ្ឋនៅខាងក្រោម បង្កការខូចខាតយ៉ាងធ្ងន់ធ្ងរត្រឹមពេលតែមួយប៉ប្រិចភ្នែក។ តាមព័ត៌មានបានឱ្យដឹងថា យ៉ាងហោចណាស់មនុស្ស ២០ នាក់ត្រូវបានជួយសង្គ្រោះ ជនរងគ្រោះ ៤ នាក់បានបាត់បង់ជីវិត និង ១០០ នាក់ផ្សេងទៀតកំពុងបាត់ខ្លួនទៅតាមលំហូរទឹក ដោយខាងក្រុមសង្គ្រោះកំពុងស្វះស្វែងក្នុងការតាមរក។
គួរឱ្យដឹងថា គ្រោះរអិលបាក់ដីខាងលើនេះដែរ គឺកើតមានឡើងក្រោយប្រទេសឥណ្ឌាទទួលរងការវាយប្រហារដោយភ្លៀងធ្លាក់ខ្លាំងជោគជាំ។ មុននេះផងដែរ ខាងនាយកដ្ឋានឧតុនិយមប្រចាំប្រទេសឥណ្ឌា បានចេញការប្រកាសអាសន្នកម្រិតក្រហមលើរដ្ឋ Uttarakhand ដោយភ្លៀងធ្លាក់ដ៏អាក្រក់កើតមាននៅតាមតំបន់ដាច់ស្រយាល៕
