កាលពីថ្ងៃទី ១៦ ខែមីនា ឆ្នាំ ២០២៥ កន្លងទៅ យ៉ាងហោចណាស់មនុស្ស ៥០ នាក់បានបាត់បង់ជីវិត ក្រោយមានអគ្គិភ័យយ៉ាងសន្ធោសន្ធៅមួយបានឆាបឆេះឡើងក្នុងក្លឹបរាត្រីមួយកន្លែងនាប្រទេសម៉ាសេដូនៀខាងជើង នេះបើតាមភ្នាក់ងារសារព័ត៌មាន MIA។
អគ្គិភ័យនោះដែរបានកើតឡើងនៅក្លឹប Pulse នាក្រុង Kocani ចម្ងាយប្រមាណ ១០០ គីឡូម៉ែត្រភាគខាងលិចក្រុង Skopje ដោយក្រុមពន្លត់អគ្គិភ័យ និង រថយន្តសង្គ្រោះបន្ទាន់បានចុះទៅដល់ទីតាំងកើតហេតុភ្លាមៗ ដោយនៅទីនោះគេជឿថាមានមនុស្សប្រមាណជា ១៥០០ នាក់បានចូលរួមក្នុងកម្មវិធីប្រគំតន្ត្រីមួយ។
ភ្លើងបានឆេះឡើងដំបូងនៅវេលាម៉ោងប្រមាណ ៣ ដោយវីដេអូស្ដែងៗបង្ហាញឱ្យឃើញអណ្ដាតភ្លើងយ៉ាងខ្លាំងសន្ធោសន្ធៅឆេះរាលចេញពីក្នុងក្លឹបមក ខណៈផ្សែងខ្មៅខ្មួលខ្មាញ់បានសាយភាយឡើងលើអាកាស។ គួរឱ្យដឹងផងដែរថា តាមការសន្និដ្ឋានដំបូង ភ្លើងអាចឆេះដោយសារតែមានការប្រើប្រាស់កាំជ្រួចនៅក្នុងក្លឹបនោះ ប៉ុន្តែមូលហេតុពិតប្រាកដយ៉ាងណានៅមិនទាន់មានការបញ្ជាក់នៅឡើយទេ៕
