ករណីដ៏រន្ធត់មួយបានកើតឡើងក្នុងប្រទេសស្រីលង្កា ដោយរទេះយោងឡើងភ្នំមួយដឹកព្រះសង្ឃចំនួន ១៣ អង្គឡើងទៅមណ្ឌលវិបស្សនា បានជួបគ្រោះថ្នាក់ដាច់ធ្លាក់ចេញពីផ្លូវ បណ្ដាលឱ្យព្រះសង្ឃចំនួន ៧ អង្គ សុគត និង ច្រើនអង្គផ្សេងទៀតរងរបួសធ្ងន់ស្រាល។
តាមការបញ្ជាក់ពីប៉ូលិសក្នុងប្រទេសស្រីលង្កា ហេតុការណ៍នេះដែរបានកើតឡើងកាលពីយប់ថ្ងៃទី ២៤ ខែកញ្ញា ឆ្នាំ ២០២៥ កន្លងទៅ ខណៈព្រះសង្ឃ ១៣ អង្គ បានប្រើប្រាស់រទេះយោងដោយខ្សែកាបឡើងទៅមណ្ឌលវិបស្សនានាវត្ត Na Uyana លើកំពូលភ្នំ Na Uyana ហើយក៏ជួបគ្រោះថ្នាក់ធ្លាក់ចេញពីផ្លូវមកលើជម្រាលភ្នំ។
ករណីនេះដែរ បានបណ្ដាលឱ្យព្រះសង្ឃ ៧ អង្គសុគត ក្នុងនោះរួមមានព្រះសង្ឃស្រីលង្កា ៤ អង្គ និង ៣ អង្គទៀតមកពីប្រទេសឥណ្ឌា រុស្ស៊ី និង រ៉ូម៉ានី។ ដោយឡែក ព្រះសង្ឃ ៤ អង្គទៀតបានរងរបួសធ្ងន់ធ្ងរ និង ២ អង្គ រងរបួសស្រាល។ តាមការស៊ើបអង្កេតបឋម បានឱ្យដឹងថា ខ្សែកាបដែលយោងរទេះឡើងលើភ្នំនោះបានដាច់ ទើបបណ្ដាលឱ្យរទេះធ្លាក់ចុះភ្នំក្នុងល្បឿនលឿន រួចក៏ផ្លោងចេញពីផ្លូវទៅបុកនឹងដើមឈើ។
គួរបញ្ជាក់ថា រទេះយោងនេះជាយានដឹកជញ្ជូនបែបបុរាណ ជាធម្មតាប្រើប្រាស់សម្រាប់ដឹកទំនិញនានាប៉ុណ្ណោះ ហើយវាក៏មានស្តង់ដាសុវត្ថិភាពតិចតួចផងដែរ។ យ៉ាងណាមិញ យានជំនិះបុរាណមួយនេះក៏ឧស្សាហ៍ឃើញប្រើប្រាស់សម្រាប់ដឹកមនុស្សឡើងភ្នំទៅមកនៅតាមតំបន់ភ្នំនាប្រទេសស្រីលង្កាផងដែរ៕
