រដ្ឋចំនួន ២២ នៅអាមេរិកដាក់ពាក្យប្ដឹងលោក ដូណាល់ ត្រាំ ជុំវិញការចង់លុបចោលសិទ្ធិទទួលបានសញ្ជាតិតាមដែនកំណើត

គណៈមេធាវីប្រចាំរដ្ឋចំនួន ២២ នៅសហរដ្ឋអាមេរិក បានធ្វើការដាក់ពាក្យបណ្ដឹងប្រឆាំងនឹងលោក ដូណាល់ ត្រាំ ជុំវិញការចុះហត្ថលេខាលើបទបញ្ជាប្រតិបត្តិលុបចោលសិទ្ធិទទួលបានសញ្ជាតិតាមដែនកំណើត។

តាមព័ត៌មានបានឱ្យដឹងថា នៅថ្ងៃទី ២១ ខែមករា ឆ្នាំ ២០២៥ រដ្ឋដែលដឹកនាំដោយប្រជាធិបតេយ្យចំនួន ២២ រួមជាមួយរដ្ឋធានី Washington និង ក្រុង San Francisco បានធ្វើការដាក់ពាក្យបណ្ដឹងនៅតុលាការសហព័ន្ធក្នុងក្រុង Boston និង Seattle ដោយលើកឡើងថា លោកប្រធានាធិបតី ដូណាល់ ត្រាំ បានបំពានច្បាប់រដ្ឋធម្មនុញ្ញដោយការបញ្ជាឱ្យមានការលុបចោលការទទួលបានសញ្ជាតិអាមេរិកដោយស្វ័យប្រវត្តិសម្រាប់ក្មេងដែលកើតលើទឹកដីអាមេរិក ទាំងដែលសិទ្ធិនេះដែរទទួលបានការការពារដោយ វិសោធនកម្មទី ១៤។

គួរឱ្យដឹងថា លោក ដូណាល់ ត្រាំ បានចេញបទបញ្ជាប្រតិបត្តិរារាំងរដ្ឋាភិបាលសហព័ន្ធមិនឱ្យធ្វើលិខិតឆ្លងដែន អត្តសញ្ញាណប័ណ្ណ ឬឯកសារដទៃផ្សេងទៀតទៅឱ្យក្មេងៗដែលមានម្ដាយរស់នៅសហរដ្ឋអាមេរិកដោយខុសច្បាប់ ឬបណ្ដោះអាសន្ន និង ក្មេងដែលមានឪពុកមិនមែនជាជនជាតិអាមេរិក ឬជាអ្នករស់នៅអាមេរិកជាអចិន្ត្រៃយ៍។ ប្រសិនបើច្បាប់នេះដាក់ចេញអនុវត្ត នោះបទបញ្ជារបស់លោកប្រធានាធិបតី ដូណាល់ ត្រាំ នឹងធ្វើឡើងលើក្មេងៗជាង ១៥ ម៉ឺននាក់ដែលកើតនៅអាមេរិកជារៀងរាល់ឆ្នាំ៕