យុវជនវ័យ ១៩ ឆ្នាំ សញ្ជាតិបែលហ្ស៊ិក ២ រូបឈ្មោះ Lornoy David និង Seppe Lodewijckx ត្រូវបានចាប់ខ្លួនឡើងតុលាការពីបទជួញដូរសត្វព្រៃខុសច្បាប់ ក្រោយរកឃើញពួកគេលាក់ស្រមោច ៥ ពាន់ក្បាលក្នុងបំពង់តេស្តនៅសណ្ឋាគារមួយកន្លែងក្នុងតំបន់ Nakuru ប្រទេសកេនយ៉ា។
ក្នុងការឡើងសវនាការលើកដំបូងនៅក្រុង Nairobi កាលពីថ្ងៃទី ១៦ ខែមេសា ឆ្នាំ ២០២៥ កន្លងទៅ បុរសវ័យក្មេងទាំង ២ រូបនោះហាក់ច្របូកច្របល់ដោយនិយាយថាពួកគេគ្រាន់តែចាប់ស្រមោចលេងប៉ុណ្ណោះ ដោយមិនដឹងថាទង្វើទាំងនោះខុសច្បាប់នោះទេ។
បើតាមភ្នាក់ងារបម្រើសេវាសត្វព្រៃប្រចាំប្រទេសកេនយ៉ា (Kenya Wildlife Service/KWS) បានឱ្យដឹងថា សត្វស្រមោចដែលដកហូតបានរួមមានស្រមោចប្រភេទ messor cephalotes ដែលជាពូជស្រមោចក្រហមធំ មានវត្តមានតែនៅអាហ្វ្រិកខាងកើតប៉ុណ្ណោះ។ ខាង KWS បានបញ្ជាក់ទៀតថា ការជួញដូរខុសច្បាប់លើសត្វស្រមោចនេះ មិនត្រឹមតែបំពានអធិបតេយ្យភាពខាងជីវសាស្ត្ររបស់ប្រទេសកេនយ៉ាប៉ុណ្ណោះទេ តែក៏បានប៉ះពាល់ដល់ទីតាំងស្រាវជ្រាវ និង សហគមន៍ក្នុងតំបន់ផងដែរ។
តាមការបញ្ជាក់ពីខាងមន្ត្រីក្នុងតំបន់បានឱ្យដឹងថា ជនសង្ស័យទាំង ២ រូបខាងលើត្រូវបានចាប់ខ្លួននៅក្នុងម៉ូតែលមួយកន្លែងដោយអាជ្ញាធររកឃើញសត្វស្រមោចចំនួន ៥ ពាន់ក្បាល ដាក់ក្នុងបំពង់តេស្តចំនួន ២២៤៤ ដោយក្នុងនោះមានដាក់សំឡីដើម្បីរក្សាជីវិតស្រមោចបានយូរ។
អាជ្ញាធរប៉ាន់ប្រមាណថា សត្វស្រមិចដែលរឹបអូសបាននោះអាចមានតម្លៃដល់ ៧៧០០ ដុល្លារ ប៉ុន្តែតម្លៃពិតប្រាកដនោះគឺអាស្រ័យលើប្រភេទស្រមោចដែលដាក់លក់លើទីផ្សារ។
លោក Philip Muruthi អនុប្រធានអង្គការអភិរក្សសត្វព្រៃនៅអាហ្វ្រិកបាននិយាយថា សត្វស្រមោចគឺដើរតួនាទីយ៉ាងសំខាន់ក្នុងប្រព័ន្ធអេកូឡូស៊ី ដូចជាជួយឱ្យដីមានសភាពល្អ ជួយដល់ការដាំដុះ និង ផ្ដល់អាហារសម្រាប់ពពួកសត្វស្លាបជាច្រើន។ លោកបានធ្វើការព្រមានទៀតថា ការជួញដូរសត្វស្រមោចអាចបណ្ដាលឱ្យមានហានិភ័យកើតមានរោគផ្សេងៗពេលដឹកជញ្ជូនដល់បរទេស៕
