រឿងរ៉ាវដ៏ក្ដៅគគុកនៃការផ្ដាច់អាជ្ញាប័ណ្ណរវាងកម្មវិធីប្រកួតសម្រស់តំណាងប្រទេសផ្សេងៗ ជាមួយស្ថាប័នកម្មវិធីប្រកួតសម្រស់ Miss Grand International ឃើញថានៅតែបន្តកើតមានឡើងបន្តកន្ទុយគ្នា ទាំងខ្លះសម្រេចចាកចេញដោយបញ្ហាផ្ទាល់ខ្លួន និង ខ្លះទៀតដោយសារតែបញ្ហាមិនត្រូវរ៉ូវគ្នាជាមួយនឹងខាងស្ថាប័នតែម្ដង។
ជាក់ស្ដែង បើគិតមកត្រឹមដើមខែធ្នូ ឆ្នាំ ២០២៤ នេះ ND របស់កម្មវិធីប្រកួតសម្រស់ Miss Grand ចំនួន ៥ រូប/ប្រទេសមកហើយ បានចេញមកធ្វើលិខិតប្រកាសផ្លូវការពីការផ្ដាច់ខ្លួនចេញពីស្ថាប័ន Miss Grand International ដោយមិនបន្តអាជ្ញាប័ណ្ណជាមួយស្ថាប័នប្រកួតសម្រស់អន្តរជាតិមួយនេះតទៅទៀត ដោយ ND មួយចំនួនសម្រេចលែងបន្តដោយសារតែការមានបញ្ហាចម្រូងចម្រាសជាមួយម្ចាស់ស្ថាប័ន MGI ផ្ទាល់ ខណៈមួយចំនួនទៀតដោយសារហេតុផលផ្ទាល់ខ្លួនប៉ុណ្ណោះ។
ចំពោះ ND ដែលប្រកាសឈប់បន្តអាជ្ញាប័ណ្ណជាមួយ MGI រួមមាន លោកស្រី អ៊ឹម សុគន្ធា ND Miss Grand Cambodia, លោក Htoo Ant Lwin ជា ND Miss Grand Myanmar, លោក Nikhil Anand ជា ND Miss Grand India, លោកស្រី Amelia Vega D’Sanchez ជា ND Miss Grand Honduras និង លោក Ivan Gunawan ជា ND Miss Grand Indonesia៕
